Ata dyshojnë se trupi i tij po mbahet qëllimisht nga autoritetet ruse në mënyrë që ata të mbulojnë gjurmët

Kur ende mbetet një mister vdekja e ish-liderit të opozitës Alexei Navalny, nëna e tij nuk ka qenë në gjendje të marrë trupin e tij pas vdekjes në një burg në Arktik. Lyudmila ka bërë të ditur se trupi i djalit të saj do të dorëzohej vetëm pasi të kishte përfunduar një ekzaminim pas vdekjes. Ekipi i Navalny beson se Navalny u vra me urdhër të presidentit Vladimir Putin.

Zëdhënësja e Alexei Navalny, Kira Yarmysh: Trupi i tij tani është në Salekhard, është një qytet tjetër, dhe trupi është marrë nga komisioni hetimor dhe ata janë duke kryer një lloj hetimi me të. Ne kërkojmë që autoritetet ruse t’ia japin menjëherë trupin e Alexeit familjes së tij.

Nënës së tij, Lyudmila Navalnaya, shërbimi i burgut i bëri të ditur se ai u rrëzua dhe ra pa ndjenja gjatë një shëtitjeje brenda burgut. Zëdhënësja, Kira Yarmysh shprehet se vdekja e Navalny ishte një vrasje e pastër dhe shpreson që liderët perëndimorë të mbanin përgjegjës presidentin rus, Vladimir Putin.

Zëdhënësja e Alexei Navalny, Kira Yarmysh: Unë mendoj se e gjithë bota ka prova sepse Alexei ishte pothuajse i vrarë tre vjet e gjysmë më parë. Ne e dinim që ekzistonte një rrezik, edhe Alexei e dinte këtë. Unë mendoj se të gjithë duhet të kuptojnë se është Vladimir Putin ai që personalisht urdhëroi vrasjen e Alexei Navalny dhe ai duhet të marrë përgjegjësinë për këtë. Dhe shpresoj që liderët perëndimorë do të përpiqen të bëjnë sa më shumë presion mbi të.

Aleatët e Navalny pretendojnë se trupi i tij po mbahet qëllimisht nga autoritetet ruse në mënyrë që ata të mbulojnë gjurmët. Navalny ishte një nga figurat më të spikatura të opozitës ruse ndaj regjimit të Putinit dhe vuajti dënimin e tij për akuza të motivuara politikisht në koloninë penale “Ujku Polar” në Kharp, rreth 1,200 milje në veri të Moskës.

Më shumë se 400 persona janë arrestuar pas tubimeve në të gjithë Rusinë. Arrestimet u kryen në 36 qytete, me numrin më të madh në kryeqytetin Moskë dhe Shën Petersburg.

Klan News