Shkon në 79 numri i viktimave në Turqi
Një 3-vjeçare u shpëtua nga rrënojat e një pallati që u shemb në Izmir të Turqisë, si pasojë e tërmetit vdekjeprurës të së premtes.
3-vjeçarja Elif Perincek, sipas asaj që shkruajnë mediat turke, u shpëtua mëngjesin e së hënës, pas më shumë se 65 orësh. Ministri turk i Shëndetësisë, Fahrettin Koca tha se më herët ishin nxjerrë nga rrënojat edhe nëna e të miturës së bashku me dy motrat e saj, por fatkeqësisht njëra prej tyre kishte humbur jetën.
Lajmi i mirë për të miturën erdhi vetëm disa orë pasi një tjetër fëmijë u gjet i gjallë dhe u nxor nga skuadrat e shpëtimit. 14-vjeçarja Idil Sirin u shpëtua pas më shumë se 58 orësh e bllokuar nën një ndërtese të shembur.
Tërmeti i fuqishëm me magnitudë 7 të Shkallës Rihter, që ra në detin Egje të premten, deri më tani i ka marrë jetën 79 personave në Turqi. 2 të tjerë humbën jetën në ishullin grek të Samosit. Të plagosurit janë të paktën 962, 219 prej të cilëve po trajtohen në spital.
Më shumë se 900 pasgoditje u regjistruan që prej tërmetit fillestar, 42 prej të cilëve me magnitudë mbi 4.
Përpjekjet për të gjetur të mbijetuarit që mund të kenë mbetur nën rrënojat e ndërtesave në Izmir vijojnë pa ndërprerje. Ministri Koca tha se nuk dihet sa persona mund të jenë nën to./tvklan.al
