Një djalë pesë-vjeçar nga Michigani ka ftuar të gjithë grupin e tij të shokëve të kopshtit për të qenë dëshmitarë në birësimin e tij ligjor.
Djali, i identifikuar si Michael, u bë pjesë e familjes së tij të re zyrtarisht në një proces të mbajtur në gjykatën e Kent County.
Një foto e bërë publike në Facebook tregoi djalin e vogël i cili qëndron në një karrige në sallën e gjyqit, pranë prindërve të tij birësues.
Pas tyre, shihen shokët e tij të kopshtit duke ngritur pankartat në formë zemre. Gjatë dëgjimit, secili fëmijë u prezantua dhe shpjegoi pse kishin ardhur për të festuar, raporton BBC.
“Michael është shoku im më i mirë”, tha një djalë i vogël i quajtur Steven.
Grupi i shokëve, mësuesit dhe prindërit shpërthyen në brohoritje dhe duartrokitje ndërsa përfundoi procesi i birësimit.
Fotografia që tregon Michael dhe shokët e tij në sallën e gjyqit, është shpërndarë me shpejtësi në rrjetet sociale, më shumë se 100 mijë herë në Facebook. /tvklan.al
