Një shëtitje në fshat rezultoi fatale për një 77-vjeçar me origjinë shqiptare. Ngjarja ka ndodhur mbrëmë në Tuoro sul Trasimeno të Italisë. Viktima është Nika Cin. 77-vjeçari ishte i njohur në fshat. Ai jetonte prej vitesh në shtetin italian së bashku me gruan dhe tre fëmijët. Ai dilte zakonisht për peshkim dhe gjueti. Por dita e djeshme ishte tragjike.
Një pusetë e hapur dhe e mbuluar me barishte i mori jetën 77-vjeçarit. Sikurse raportojnë mediat italiane, shqiptari u rrëzua në 8 metra thellësi. Alarmi për zhdukjen e tij u dha në orën 01:00 të natës nga bashkëshortja. Ajo lajmëroi policinë kur pa se bashkëshorti nuk ishte kthyer ende në shtëpi. Kërkimet zgjatën deri në orën 06:00, kur autoritetet gjetën pusin ku ishte rrëzuar Nika Cin dhe e nxorrën prej andej.
Mediat shkruajnë se puseta ishte në një pronë private dhe duhej të ishte e mbyllur. Hetimet kanë nisur për këtë ngjarje, ndërkohë që trupi i pajetë i 77-vjeçarit iu nënshtruar ekspertizës mjeko-ligjore.
/tvklan.al
