“Erdhi dita” për Albin Kurtin: Populli vendosi ndryshimin

Posta

“Erdhi dita” për Albin Kurtin: Populli vendosi ndryshimin

10:17 07/10/2019

Një ditë pas zgjedhjeve të parakohshme parlamentare në Kosovë, kryetari i Lëvizjes Vetëvendosje, Albin Kurti thotë se ndryshimi ndodhi. Në një postim në Facebook, Kurti shkruan se qytetarët vendosën me votë që “drama e shtetit të kapur të mos ketë fund tragjik”. Sipas Albin Kurtit, erdhi dita që Vetëvendosje të qeverisë Kosovën.

“Prej mbrëmë ka shpresë. Sepse dje pati guxim. Ju votuat masivisht duke bërë që opozita e deridjeshme të korrë fitore bindëse. Ndryshimi ndodhi. Dhe, jo vetëm kaq. Populli vendosi që këtij ndryshimi i prin dhe do t’i prijë Lëvizja VETËVENDOSJE!. Të gjithë ju që keni votuar dje u jam falenderues që keni kryer detyrën qytetare e obligimin demokratik në një kohë të vështirë siç është kjo që po kalojmë dhe në një vend të dashur siç është Kosova jonë.

Të gjithë ju që keni votuar për ndryshimin, e sidomos për VETËVENDOSJE!-n, u jam mirënjohës për vetëdijen e lartë dhe ndërgjegjen e thellë për ta shpëtuar republikën tonë nga zvetënimi i mëtutjeshëm. Qytetarët folën me votën e tyre. Ata ndërhynë masivisht në skenën politike në mënyrë që drama kosovare e shtetit të kapur të mos ketë fund tragjik. Urtësia e popullit tonë në çastet vendimtare ishte asgjë më pak sesa fantastike.

Tash, ne duhet të punojmë. Ama sërish bashkë me qytetarët. Kurrë anash apo prapa qytetarëve. Bashkë, gjithnjë. Punët e vështira që na presin vetëm sa ma shtojnë vullnetin. Ato nuk kanë llogari me neve, me juve, me mua. Sepse: Erdhi dita! Ju faleminderit të gjithëve dhe secilit”, shkruan kryetari i LVV, Albin Kurti.

Sipas rezultateve të Komisionit Qëndror të Zgjedhjeve në Kosovë, Vetëvendosje rezulton fituese me diferencë të ngushtë votash nga Vjosa Osmani e LDK-së në vend të dytë. Mbrëmjen e së dielës kur dolën rezultatet e para të zgjedhjeve, Kurti deklaroi se do të kërkojë koalicion me LDK-në për të formuar qeverinë. /tvklan.al


OTP
Reklama
Grupi
LAJMET

Të ngjashme

Reklama
AZHBR
UKT
Grupi
UKT