Erdogan, presidenti i cili u rezistoi kryengritjeve

Posta

Erdogan, presidenti i cili u rezistoi kryengritjeve

23:40 25/06/2018

Rexhep Taip Erdogan arriti kulmin e pushtetit politik me zgjedhjet e së dielës. Ai shndërrohet në të parin president të Turqisë moderne që merr edhe kompetencat e kryeministrit. Fuqinë ekzekutive ia dha referendumi i Prillit 2017 që e shndërroi Turqinë në Republikë Presidenciale.

Tendencën për t’u shndërruar në një lider absolut, 64-vjeçari e ka treguar gjatë gjithë rrugëtimit të tij të gjatë politik.

Prova e fundit ishte në 2014-ën, kur me ndryshimet kushtetuese të aprovuara me nismën e partisë së tij u bë i pari president i zgjedhur me votë popullore dhe jo nga parlamenti. Dorë drejt konsolidimit në pushtet i dha edhe grushti i dështuar i shtetit i Korrikut 2016, për të cilin akuzoi ish-aleatin e tij Fetullah Gylen. Prej asaj kohe, Erdogan nisi spastrimin e administratës dhe ushtrisë nga kundërshtarët dhe ata që ai i quante puçistë, nën pretekstin se mbështesnin Gylenin.

Strategjia e spastrimit nuk është e re në karrierën politike të presidentit Erdogan. Nga viti 2007 në 2010-ën, pikërisht me ndihmën e Fetullah Gylen dhe përmes dy referendumeve për ndryshime kushtetuese, Erdogan arriti të ulë ndjeshëm fuqinë dhe pavarësinë e ushtrisë. Disa nga ushtarakët më të lartë në Turqi, gazetarë dhe kundërshtarë të tij politikë u dënuan në dy proceset e famshme gjyqësore, “Vareja” dhe “Ergenekon”.

Përgjatë trajektores 15-vjeçare në pushtet “sulltani i Turqisë moderne” u ka mbijetuar disa përpjekjeve për kryengritje popullore, ndërsa marrëdhëniet me Perëndimin janë shoqëruar shpeshherë me kritika dhe akuza për shkelje të të drejtave të njeriut.

Tv Klan


Reklama
LAJMET

Të ngjashme

Reklama
UKT
UKT

Grupi