Arkiva Lajme – Tv Klan 1999
Flotës ushtarake shqiptare i dhurohen 5 motovedeta. Qeveria amerikane në vazhdën e ndihmave dhënë për institucionet shqiptare ka pasuruar më tej flotën tonë detare me 5 mjete të shpejta lundrimi. Sot në distriktin detar të Durrësit në bazën e Bishtit të Pallës, presidenti Mejdani, kryeministri Majko, ministri i mbrojtjes Hajdaraga dhe ambasadorja amerikane Lino morën pjesë në manovrat detare të motovedetave.
Në një fjalim të shkurtër ministri i Mbrojtjes Hajdaraga falenderoi qeverinë amerikane për ndihmën e vazhdueshme ndaj ushtrisë shqiptare. Me ndihmën e komunitetit të huaj tha Hajdaraga dhe me profesionalizmin tonë, shumë shpejt ushtria shqiptare do të radhitet në forcat e Natos. Më pas presidenti, kryeministri, ambasadorja amerikane dhe ushtarakë të tjerë të lartë hipën në motovedeta duke inaguruar dhe herën e parë të tyre në ujrat shqiptare.
5 motovedetat e dhuruar nga SHBA kanë si mision ruajtjen e vijës tonë bregdetare. Misioni i tyre do të ketë dhe karakter humanitar, pasi ato do të përdoren dhe në raste emergjente si kërkim e shpëtim në raste mbytjesh. Motovedetat e reja të flotës ushtarake do tju bashkangjiten atyre të Guardia di Finanzas, në kontrollin dhe parandalimin e trafikut të klandestinëve.
Në manovrat e sotme nuk kanë munguar dhe incidentet, motovedetës ku udhëtonin zv/ministri i Mbrojtjes Boçka dhe shefi i shtabit Aleks Andoni i shkarkohen bateritë në mes të detit. Megjithatë 5 motovedetat që nisën që sot misionin e tyre do të perfeksionojnë më tej aktivitetin e flotës tonë detare./tvklan.al
Gazetar – Eduart Frangaj
