Fuqizimi ushtarak i Rusisë dhe influencat e saj në rajon janë shqetësimi kryesor i momentit të Aleancës së Atlantikut të Veriut, e cila nisi në Tiranë sesionin e punimeve të Asamblesë Parlamentare.
Në konferencën për shtyp me delegacionin shqiptar, President i Asamblesë Parlamentare të NATO-s, Michael Turner tha se Shqipëria është një faktor më shumë stabiliteti në Ballkan.
“
Partnerët tanë Europianë duhet të bëjnë më shumë. Ne duhet t’i japim siguri partnerëve tanë, sepse nuk duhet të harrojmë që ekonomia e Rusisë është më e vogël se ajo e Italisë, por fuqizimi ushtarak i saj përbën një kërcënim në një kohë kur Rusia e ka shpallur NATO-n si kundërshtar të saj. Ne e vlerësojmë kontributin që po jep Shqipëria në angazhimet e Aleancës si dhe në stabilitetin dhe sigurinë e Rajonit të Ballkanit. Gjithashtu vlerësojmë edhe mbështetjen e Shqipërisë për politikën e dyerve të hapura të NATO-s. Anëtarësimi i Malit të Zi dhe Maqedonisë do të sillte më shumë siguri në Ballkan
”, ka thënë Michael Turner, President i Asamblesë Parlamentare të NATO-s.
Edhe pse Marrëveshja e Ohrit nuk po zbatohet nga shteti maqedonas, kreu i delegacionit shqiptar në Asamblenë e NATO-s, Pandeli Majko, tha se Shqipëria nuk do të aplikojë politika bllokuese për anëtarësimin e Shkupit në Aleancë.
“
Shqipëria nuk do të kushtëzojë anëtarësimin e vendeve të rajonit, ku jeton pakica shqiptare. Nga ne nuk do të dëgjoni deklarata gjeneralësh. Mbështesim politikën e dyerve të hapura të NATO-s
”, deklaroi Majko.
Sesioni i verës i Asamblesë Parlamentare e NATO-s mbahet për herë të parë në Shqipëri. Temat kryesore të diskutimit do të jetë mbi sigurinë dhe stabilitetin, përballimin e krizës së emigrantëve si dhe masat që duhen marrë për luftën kundër terrorizmit. /TV KLAN