Ministri i jashtëm turk Cavusoglu ka zhvillura bisedime në Ministrinë e jashtme greke me homologun Niko Dendias. Në konferencën për shtyp pas takimit ndryshe nga sa kishte ndodhur dy muaj më parë në Ankara të dy homologet shmangën debatet publike dhe pyetjet nga gazetaret.

Ministri i Jashtëm Nikos Dendias tha se Greqia shikon një “normalizim gradual” të marrëdhënieve dy paleshe me Turqinë, megjithatë se pranoi se të dy palët mbajnë qëndrime të ndryshme dhe për disa çështje, kanë pikëpamje të kundërta.

Dendias tha se të dy palët ranë dakord mbi një listë të programeve të bashkëpunimit ekonomik, si dhe mbi njohjen reciproke të certifikatave të vaksinimit Covid-19. Në komentet e tij, Cavusoglu tha se Athina dhe Ankaraja dëshirojnë të “rrisin bashkëpunimin” dhe të kërkojnë zgjidhje për problemet e tyre “në bazë të ligjit ndërkombëtar dhe interesave të përbashkëta.

Të dy palët konfirmuan se kryeministri grek Kyriakos Mitsotakis do të takohet me Presidentin turk Recept Tajip Erdogan në samitin e NATO-s në Bruksel në 14 Qershor. Para këtij takimi Çavusoglu kishte deklaruar për gazetën greke To Vima se Greqia dhe Turqia duhet që t’i zgjidhin vetë bashkarisht problemet mes tyre dhe jo te presin zgjidhje nga BE.

Shefi i diplomacisë turke po ashtu kërkoi nga Athina që të shmangte përdorimin e çështjes se anëtarësimit të vendit te tij në Bashkimin Evropian si një ‘kartë’ kundër Turqisë. Ndërkaq duket se e vetmja kontradikte publike e shfaqur publikisht gjatë vizitës së Cavusoglu në Greqi mbeti trajtimi i pakicës myslimane që jeton në rajonin verilindor të Thrakës, pranë kufirit turk. Pas vizitës që zhvilloi në këtë zonë ministri i jashtem turk, ministria e jashtme greke reagoi ashpër ndaj deklaratave të tij se komuniteti mysliman me rreth 120 mijë banore në këtë rajon është pakicë etnike turke.

Athina i konsideron ata si myslimanë grekë. Turqia këmbëngul që banorëve që jetojnë në këtë zonë si një pakicë etnike turke t’u jepen të gjitha të drejtat që parashikojnë konventat ndërkombëtare. Çavusoglu vizitoi disa shkolla në Thrake, varrin e Sadik Ahmet, dikur anëtar i Parlamentit dhe kreu i një partie të hapur pro-turke, si dhe takoi myftinitë në qytetet e Komotinit dhe Xanthit.

Klan News