Prokuroria për Krime të Rënda kërkon caktimin e masës së sigurisë “arrest me burg” për 8 persona nga Fieri, të dyshuar për veprat penale të “trafikimit të lëndëve narkotike” në kuadër të grupit të strukturuar kriminal, të arrestuar para dy ditësh, në vijim të një hetimi të nisur nga akuza në Qershor të vitit 2016.

Në bazë të veprimeve hetimore të deritanishme, rezulton se:

Prokuroria për Krime të Rënda ka nisur hetimet në Qershor 2016, pasi Meto Skënderaj dyshohet se, me veprime aktive bashkëpunuese në kuadër të pjesëmarrjes në grupin e strukturuar kriminal, me Leo Tafa dhe Mehmet Skënderaj, siguronte sasi bimësh narkotike, të cilat më pas i ka magazinuar ato, duke i përpunuar e përgatitur (tharë) me qëllim shitjen dhe trafikimin e tyre jashtë teritorit shqiptar.

Këto veprime i ka kryer në banesën e Mehmet Skënderaj, në fshatin, Ninësh, Komuna Fratar/Mallakastër, i cili ka vënë në dispozicion banesën e tij. Për të realizuar këtë, atij i është dashur edhe ndihma e Ardit Tafa, Dorian Tafa, Eglantin Tafa dhe Miklovan Kuka (të gjithë nga fshati Rreth, Komuna Libofshë, Fier) dhe Artan Skëndaj (ky i fundit banues në Ninsh), si dhe ndihma e shtetaseve J.M dhe T.GJ.

Në kontrollin që policia bëri në banesën e Mehmet Skënderaj, në tre dhoma të banesës gjeti grumbuj sasishë bimësh narkotike në gjendje të tharë dhe në proçes tharjeje, si dhe nëpër tavane të dhomave gjeti degëza bimësh narkotike në proçes tharjeje. Këtu u sekuestrua sasia prej 145 kg lëndë narkotike e dyshuar kanabis sativa dhe sasia prej 425 fara bimë e dyshuar kanabis, që u gjet në një kuti plastike në formë të rrumbullakët, me peshë 26.70 gramë.

Tek gjetja dhe sekuestrimi i kësaj sasie bimësh narkotike në proces përpunimi për shitje dhe e farave të bimëve narkotike, u arrit të shkohej, në datë 23.10.2016, kur rreth orës 07.00, forcat e policisë ndoqën mjetin tip “Audi A4” ngjyrë të bardhë, me targa AAxxxJN,  në të cilin udhëtonin Meto Sheme Skënderaj, Leo Tafa, Ardit Tafa, J.M dhe T.GJ, i cili ndaloi në banesën/ambientin ku ishte magazinuar bima dhe farërat e narkotikut (lartcituar).

Pas kësaj, u ndërhy në banesën e Mehmet Skënderaj, ku u gjetën, veç Mehmet Skënderaj, edhe Dorian Tafa, Eglantin Tafa, Miklovan Kuka dhe Artan Skënderaj. Në momentet e ndërhyrjes së policisë në banesë, Dorian Tafa, Eglantin Tafa dhe Miklovan Kuka, u larguan me vrap në drejtim të një përroi përgjatë një terreni të pyllëzuar dhe pas ndjekjes përreth 1 kilometër, ata u arrestuan.

Mehmet Skënderaj u deklarua se kishte vendbanimin aktual në lagjen Cole/Vlorë dhe se ishte thjesht një “punëtor”’, të tjerët nuk dhanë asnjë shpjegim për faktin e verifikuar në vend, ndërsa Artan Skënderaj u deklarua se nuk kishte asnjë lidhje me këtë që u konstatua.

Sa lart, ngrihen dyshime të bazuara në provat e deritanishme, se Meto Skënderaj ka konsumuar elementë të veprës penale “prodhim dhe shitje të narkotikëve”’, kryer në bashkëpunim, në kuadër të “pjesëmarrjes në grupin e strukturuar kriminal”.

Për këtë arsye, Prokuroria për Krime të Rënda kërkon caktimin e masës së sigurisë: “Arrest me burg” për Leo Tafa, Meto Skënderaj, Mehmet Skënderaj të dyshuar si organizatorë, ndërsa “arrest me burg” me afat 30 ditë (të dyshuar si “punëtorë”), akuza kërkon për; Indrit Tafa, Dorjan Tafa, Englatin Tafa, Artan Skenderaj, Miklovan Tafa./tvklan.al