Grupi parlamentar i Partisë Demokratike thotë se ka vendosur që të nisë procedurën për shkarkimin e kryetares së Kuvendit, Lindita Nikolla. Në një postim në rrjetet sociale thuhet se Rama, për t’iu fshehur Kuvendit, detyroi Lindita Nikollën që të mbyllë Parlamentin ditën e sotme.

Veprimi i sotëm i Kryetares së Kuvendit, është akt i paprecedent në 32 vjet demokraci”, thuhet në reagim.

Sipas grupit parlamentar të PD-së, kryeparlamentarja Nikolla shkeli në mënyrë flagrante rregulloren dhe u mohoi të drejtën deputetëve të Kuvendit që të diskutojnë për çështjet e përfshira në rendin e ditës.

NJOFTIM I GRUPIT PARLAMENTAR TË PARTISË DEMOKRATIKE

Sot Edi Rama, i kapur në flagrancë nga drejtësia amerikane se ka korruptuar dhe bashkëpunuar me një angjent të FBI të lidhur me Rusinë, jo vetëm iu fsheh Kuvendit, por detyroi Lindita Nikollën të mbyllë Parlamentin.

Veprimi i sotëm i Kryetares së Kuvendit, është akt i paprecedent në 32 vjet demokraci. Në shkelje flagrante të Rregullores, Kryetarja e Kuvendit i mohoi të drejtën deputetëve të Kuvendit që të diskutojnë për çështjet e përfshira në Rendin e Ditës, duke përdhosur parlamentarizmin dhe duke minuar funksionimin demokratik të Kuvendit.

Ndërsa drejtësia amerikani asgjesoi politikisht Edi Ramën, duke faktuar para botës mbarë, lidhjen e tij korruptive me një zyrtar të FBI-së, të lidhur me Rusinë, Kryetarja e Kuvendit asgjësoi Parlamentin për llogari të Edi Ramës.

Gjithashtu, nga sot Parlamenti i Shqipërisë ka humbur mundësinë për të funksionuar në mënyrë demokratike dhe përgjegjës për këtë janë vetëm Edi Rama dhe Lindita Nikolla.

Për shkak të shkeljes flagrante të Rregullores, minimit të parlamentarizmit dhe funksionimit demokratik të Kuvendit, Grupi Parlamentar i Partisë Demokratike, bazuar në pikën 4, të nenit 114 të Rregullores, ka vendosur të nisë procedurën për shkarkimin e Kryetares së Kuvendit znj. Lindita Nikolla./tvklan.al