Agjencitë federale amerikane janë goditur sërish nga një sulm kibernetik. Shtëpia e Bardhë ka deklaruar se pas kësaj qëndron Kremlini.
Sipas mediave ndërkombëtare sulmi vjen teksa Moska dhe Washington-i përgatiten në 16 Qershor për samitin mes dy liderëve në Gjenevë, pas një vale të gjerë tensionesh mes dy vendeve.
Në një deklaratë Shtëpia e Bardhë shprehet se kjo fushatë për vjedhje informacioni nuk duhet lejuar të dëmtojë më tej marrëdhëniet me Rusinë.
Autoritetet u përpoqën të minimizojnë përmasat e sulmit kibernetik, gjatë të cilit hakerët kishin dërguar emaile me kode të dëmshme që vinin në shënjestër sistemet kompjuterike të disa agjencive federale, organizatave studimore dhe grupeve humanitare.
Kompania Microsoft, e cila e bëri publik sulmin bëri të ditur se beson që emailet e dëmshme ishin bllokuar nga parametrat mbrojtëse të sistemit.
Takimi Biden-Putin vjen për një seri çështjesh të rëndësishme si ndërhyrjet në zgjedhjet amerikane, kriza në Ukrainë, sulmet kibernetike, burgosja e Aleksei Navalny-t etj.
Klan News
