Kryeministri Edi Rama së bashku me Ministren e Shëndetësisë, Ogerta Manastirliu, kanë inspektuar sot strukturën e re spitalore për përballimin e situatës së pandemisë së Covid-19.
Ky spital, i pajisur me 100 shtretër, do të vihet në dispozicion për pacientët me Covid-19, ndërsa janë përgatitur dhomat përkatëse për stadet e pacientëve, përfshirë dhomat e terapisë intensive, por edhe një dhomë për emergjenca kirurgjikale.
Kreu i qeverisë u shpreh i kënaqur me përfundimin e kësaj strukture, ndërsa shtoi se situata në vendin tonë me këtë infeksion u përballua mjaft mirë.
“Uroj shumë të mos kemi valë tjetër, por rreziku është i madh. Duhen ruajtur rregullat, sepse mund të ndodhë që numrat të rriten dhe ky spital është përgjigja e duhur për të qenë gati, si dhe masat e tjera që po marrim. Është fantastik, është fantastik”. /tvklan.al
