#Opinion | Emision politik live nga #BlendiFevziu në #TvKlan

Të ftuar: Monika Kryemadhi, Shpëtim Idrizi, Marin Suli

Monika Kryemadhi, ish-kryetare e LSI, deputete e Partisë së Lirisë e cila ka qenë në qendër të vëmendjes ditët e fundit me zhvillimet e brendshme të Partisë së Lirisë, me një lloj konflikti politik me ish-Presidentin e Republikës dhe bashkëshortin e saj, Ilir Meta. Çfarë po ndodh brenda Partisë së Lirisë? Cili është aksioni që po ndërmerr Ilir Meta? Cilat janë hatërmbetjet politike të tij me Monika Kryemadhin dhe me ish-lidershipin e Lëvizjes Socialiste për Integrim përpara rikthimit të Metës në krye të partisë? Mbi të gjitha, sulmet e fundit të Metës ndaj SPAK-ut dhe çfarë po heton SPAK për Monika Kryemadhin duke nisur që nga kontrata e famshme e lobimit që po diskutohet, çështja e hetimit të pasurisë apo dosja, përmendja e famshme e operacioneve plastike dhe shpenzimeve për të cilat është folur pak kohë më parë.

Përse ka konflikt politik me Metën? Kryemadhi: Unë nuk them “po shefi”, debati nisi për atë paçavuren

Deputetja Monika Kryemadhi thotë se nuk ka konflikt politik me Ilir Metën, por sipas saj, ky i fundit është merr këshilla të gabuara nga këshilltarët e rinj në Partinë e Lirisë.

E ftuar në emisionin Opinion në Tv Klan, Kryemadhi tha se në mbledhjen e Kryesisë së partisë nuk ka patur diskutime me tone të larta, por nga ana tjetër theksoi se ajo nuk është as personazh që të aprovojë çdo gjë që thotë kryetari.

Sipas Kryemadhi, debati në Partinë e Lirisë, siç përmend Meta për “cimkaxinj”, ka nisur pas sulmit hakerues disa javë më parë të kompjuterave në selinë e partisë. Denoncimin që bëri vetë Meta në organet ligjzbatuese për këtë çështje, Monika Kryemadhi e konsideron si paçavure.

Blendi Fevziu: Cili është thelbi i konfliktit tuaj politik?

Monika Kryemadhi: Nuk mendoj që ka konflikt, ka një sjellje ndryshe të këshilltarëve të gabuar që ai ka mbledhur. Këto janë debate që unë i kam bërë në mbledhjen e Kryesisë.

Blendi Fevziu: Ka qenë e tensionuar mbledhja e Kryesisë?

Monika Kryemadhi: Jo nuk ka qenë e tensionuar. Debati që Monika Kryemadhi di të bëjë gjithmonë, nuk bën debat duke thënë po shefi, Monika bën debat duke treguar që debati ka filluar me atë paçavuren e famshme të denoncimit që është firmosur nga z.Meta përsa i përket serverave. Debati është edhe për shumë gjëra të tjera që kanë të bëjnë sa i përket meritokracisë, angazhimit, funksionimit të strukturave, marrjes së përgjegjësisë. Unë nuk mendoj që një parti politike është thjesht like dhe share në Facebook. Struktura e një partie politike është kontakti fizik i drejtpërdrejt me njerëzit. Ajo paçavure e firmosur nga Ilir Meta është një…

Kryemadhi sulmon bashkëpunëtorët e Metës: Rrogëtarët e Presidencës tani marrin rrogën në Partinë e Lirisë

Deputetja e Partisë së Lirisë, Monika Kryemadhi ka sulmuar bashkëpunëtorët e Ilir Metës, një pjesë të të cilëve i kishte në Presidencë dhe që tashmë i ka marrë në parti.

Në një intervistë për emisionin Opinion në Tv Klan, Kryemadhi e konsideron artificial problemin që ka shfaqur Ilir Meta ditët e fundit, kur flet për tradhtarë dhe çimkaxhinj brenda Partisë së Lirisë.

Situata nisi pas sulmit kibernetik në disa kompjutera të selisë së partisë disa javë më parë, për të cilën është bërë dhe denoncim. Kryemadhi thotë se nuk ka ndodhur asnjë përgjim apo situatë e tillë, siç insinuon Ilir Meta, por fajin ia le bashkëpunëtorëve të ish-Presidentit, të cilët sipas saj e kanë bindur Ilir Metën se anëtarët e partisë janë përgjuar.

Monika Kryemadhi: Është gënjyer Ilir Meta. Sepse kur mbledh rreth vetes njerëz të cilët mendojnë që janë rrogëtarë, sepse një parti politike nuk mbahet me rrogëtarë dhe servilë sedentarë. Kur njerëzit të cilët e kanë mendjen bosh dhe nuk e mbushin dot kohën me aksion opozitar atëherë do të krijojnë armikun imagjinar. Ai material nuk është shkruar nga një profesionit, është shkruar nga një jurist i cili nuk njeh…

Blendi Fevziu: Ka shkuar një ditë dhe ka parë që s’ka servera të kamerave? Ka shkuar një ditë dhe ka gjetur ndonjë përgjues në zyrë?

Monika Kryemadhi: Jo jo. Serverat e godinës së Partisë së Lirisë janë servera që çdo 1 javë fshihen dhe riformatohen. E dyta, ka luhatje tensioni. Në luhatjet e tensionit mund të ketë një moment kontakti 1 sekond i cili është fikur dhe është ndezur përsëri.

Blendi Fevziu: Pra ky është problem elektrik apo politik?

Monika Kryemadhi: Ky është me thënë të drejtën problem njohurish. Kjo zgjidhet me IT.

Blendi Fevziu: Po çfarë kanë gjetur?

Monika Kryemadhi: Asgjë nuk kanë gjetur. Është një fantazi e krijuar nga një grup njerëzish të cilët nga rrogëtarë në Presidencë vijnë dhe bëhen rrogëtarë në Partinë e Lirisë.

Blendi Fevziu: E kanë bindur Metën që përgjohet?

Monika Kryemadhi: Jo, i kanë thënë jemi përgjuar ne, nuk kanë thënë që është përgjuar Ilir Meta. Personat i kanë thënë Ilir Metës jemi përgjuar ne. Por nuk është ky problemi i shqiptarëve. Do vijë Prokuroria, do ta shikojë, do i nxjerri si budallenj ata që i kanë bërë.

Kryemadhi kundër Metës për sulmet ndaj drejtësisë: Nuk e kemi betejën me SPAK-un

Deputetja e Partisë së Lirisë dhe bashkëshortja e llir Metës ka dalë kundër këtij të fundit sa i përket akuzave të ashpra në adresë të SPAK dhe drejtuesit të saj Altin Dumani.

Në një intervistë për emisionin Opinion në Tv Klan, Monika Kryemadhi tha se nuk është peng i askujt, duke ju referuar SPAK-ut.

Duke folur për këtë të fundit, deputetja Kryemadhi u shpreh se Prokuroria e Posaçme nuk është betejë politike e Partisë së Lirisë.

Monika Kryemadhi: Për çfarë i duhet Partia e Lirisë Altin Dumanit? Po pse Altin Dumani dhe jo Prokuroria e Tiranës? Po pse jo gjykata? Pse jo KLP? Pse jo Edi Rama? Pse mo beteja e Partisë së Lirisë është SPAK-u?

Blendi Fevziu: Padyshim që nuk është, e asnjë partie. SPAK-u nuk del në zgjedhje.

Kujtojmë se gjatë 3 ditëve të fundit, Ilir Meta ka bërë akuza të forta në adresë të SPAK dhe kreut të kësaj prokurorie.

Hetimi për pasurinë/ Kryemadhi: SPAK-u mori si kriminel kirurgun që operoi fëmijën tim, ka pyetur gjithë shoqërinë time

Deputetja e Partisë së Lirisë Monika Kryemadhi është nën hetim nga SPAK për pasurinë, pas denoncimit të bërë disa vite më parë nga Halit Valteri ku përmenden fatura të operacioneve plastike të saj jashtë shtetit.

E ftuar në studion e emisionit Opinion, Kryemadhi ka folur për këtë çështje, dhe ka treguar se rreth 100 persona janë pyetur nga SPAK në kuadër të hetimeve për pasurinë e saj.

Mes personave të pyetur nga Prokuroria e Posaçme, tregoi Kryemadhi, është edhe një kirurg italian që ka operuar fëmijën e saj.

Deputetja Kryemadhi tha se është e pashqetësuar për hetimin e SPAK, por denoncoi presionet që sipas saj bëhen ndaj personave që pyetën në lidhje me këtë hetim.

Monika Kryemadhi: Nuk mund të toleroj metodologjinë për kërcënimin dhe intimidimin që ju bëhet dëshmitarëve që thërrasin.

Blendi Fevziu: Kë kanë intimiduar?

Monika Kryemadhi: Vetëm për mua mund të kenë thirrur 100 veta. E dini ju që një doktor i cili ka operuar fëmijën tim, i cili ka që në ’90 që operon në Shqipëri dhe ka qenë vullnetar për fëmijët, është italian, ka qenë kirurg, pediatër etj. Është marrë në aeroport si kriminel. I janë hequr lidhëset, i është hequr rripi, e kanë çuar në komisariat, doktor i nderuar, e kanë marrë dhe e kanë çuar në SPAK për ta pyetur. Doktori ka kartelat mjekësore, sepse më shumë para ka harxhuar SPAK-u për përkthimin e letrave të porosisë se sa kanë kushtuar heqja e një lipome të fëmijës tim. Se kur i hiqet fëmijës një lipomë, nuk është operacion plastik. Dhe kur ke kartelën mjekësore që është hequr një lipomë, nuk mund të marrësh si kriminel një kirurg. Kur ke kartelën mjekësore që ta ka sjellë Italia, ke numrin e telefonit, ke adresën dhe mund të komunikosh.

Blendi Fevziu: Po njerëz të afërt tuaj janë thirrur?

Monika Kryemadhi: Gjithë shoqëria ime është thirrur, edhe të gjithë kanë qëndruar stoikë.

Blendi Fevziu: Po pse flisni për presione?

Monika Kryemadhi: Sepse i kanë kërcënuar, i kanë intimiduar. Si mund të marrësh një doktor italian dhe ta pyesësh a të ka dhënë Monika Kryemadhi lekë cash?

SPAK i sekuestroi celularin, Kryemadhi: Kisha biseda me Ramën, bënim thashetheme edhe për Fevziun

SPAK i ka sekuestruar deputetes Monika Kryemadhi një celular në shtëpinë e nënës së saj në kuadër të hetimeve për pasurinë që po zhvillohen ndaj saj.

Kryemadhi e ka kërkuar në GJKKO kthimin e këtij celulari, por ende nuk e ka marrë.

E ftuar në emisionin Opinion në Tv Klan, deputetja Monika Kryemadhi tregoi se këtë celular e ka përdorur në periudhën 2013-2015 kur LSI në atë kohë ka qenë në bashkëqeverisjes me PS-në dhe ka komunikime me Kryeministrin Edi Rama.

Blendi Fevziu: Çfarë gjeti SPAK-u në shtëpinë e nënës tuaj?

Monika Kryemadhi: Gjeti telefonat e fëmijëve.

Blendi Fevziu: Është rezidencë e juaja aty?

Monika Kryemadhi: Po e jona është. Ne të gjithë vendosim adresën 164 sepse janë dy shtëpi të bashkuara bashkë dhe kanë një derë. Dy prona të bashkuara bashkë.

Blendi Fevziu: Cila është historia e një telefoni?

Monika Kryemadhi: Është një telefon im i periudhës 2013-2015 që pjesa më e madhe e komunikimeve të mia janë me Kryeministrin Edi Rama në atë kohë.

Blendi Fevziu: Është koha kur ju keni qenë pjesë e qeverisjes, partia juaj.

Monika Kryemadhi: Monika nuk ka qenë pjesë e qeverisjes.

Blendi Fevziu: Edhe çfarë kanë gjetur brenda këtij telefoni?

Monika Kryemadhi: Asgjë s’kanë gjetur.

Blendi Fevziu: Me Ramën çfarë shkruanit ju?

Monika Kryemadhi: Çdo gjë kemi shkruajtur, edhe thashetheme për ty kemi bërë.

Blendi Fevziu: Po m’i thuaj dhe tani publikisht…

Monika Kryemadhi: Nuk i mbaj mend me thënë të drejtën, por të mira janë.

Kandidimi i Belerit për eurodeputet i Mitsotakis/ Idrizi: Akt i paprecedentë, por lajm i mirë për Shqipërinë

Trondit Monika Kryemadhi: Kam raport të ngrirë bashkëshortor me Ilir Metën

Në përfundim të intervistës për “Opinion” në Tv Klan gjatë së cilës Monika Kryemadhi foli për ngjarjet brenda Partisë së Lirisë, sulmet e Ilir Metës ndaj SPAK dhe hetimet e këtij të fundit ndaj saj, deputetja e PL iu përgjigj edhe një pyetjeje personale.

Një nga pikëpyetjet më të mëdha është çfarë po ndodh brenda raportit bashkëshortor të Monika Kryemadhit dhe Ilir Metës, përtej ndarjes politike. Përgjigjja e Kryemadhit ishte tronditëse pasi tha se ky raport është i ngrirë.

Blendi Fevziu: Pyetja e fundit, është personale megjithëse zgjidhni ju të përgjigjeni apo jo. Si është raporti juaj bashkëshortor me Ilir Metën?

Monika Kryemadhi: Raporti im bashkëshortor me Metën është një raport për momentin i ngrirë për shkak të konfliktit në parti se sigurisht që brenda familjes tonë, familjes së vogël, ka ndërhyrë njerëz të cilët mendojnë që duke shkatërruar pozicionimet apo lidhjet familjare do të kenë karrierë politike. Mendoj që nuk është hera e parë që unë dhe Ilir Meta kemi këto konflikte. Ne nuk kemi këto konflikte parimore, morale midis njëri-tjetrit. Konfliktet tona janë vetëm konflikte politike.

Blendi Fevziu: Të cilat reflektohen edhe në jetën private.

Monika Kryemadhi: Patjetër që reflektohen sepse në qoftë se ne jemi dy njerëz të cilët punojmë nga mëngjesi deri në darkë në politikë, sigurisht që marrëdhënia është e përditshme edhe në familje. Ajo që mua më bën përshtypje dhe që e them gjithmonë, është që njeriu sa të rrojë do të mësojë. Mendjelehtësia më e madhe si te burrat, edhe te gratë qëndron kur mendojnë që lumturinë e tyre dhe pushtetin e tyre mund ta ndërtojnë duke rrënuar lumturinë dhe familjen e dikujt tjetër, por kjo nuk ndodh. Pse nuk ndodh? Nuk ndodh sepse marrëdhënia morale është shumë më e rëndësishme se marrëdhënia financiare.

Kandidimi i Belerit për eurodeputet i Mitsotakis/ Idrizi: Akt i paprecedentë, por lajm i mirë për Shqipërinë

Kandidimi i kryebashkiakut të zgjedhur të Himarës, Fredi Belerit për eurodeputet në zgjedhjet evropiane të 9 Qershori nga partia e djathtë në pushtet “Demokracia e Re” e kryeministrit grek Kyriakos Mitsotakis ka bërë mjaft bujë në mediat shqiptare dhe fqinje ditët e fundit. Është pikërisht kjo temë në të cilën është fokusuar emisioni i sotëm i “Opinion” në Tv Klan.

I ftuar në emision ka qenë kryetari i PDIU-së, Shpëtim Idrizi, i cili ka thënë se ky është një akt i paprecedentë duke shtuar se sipas tij, t’i afrosh Fredi Belerin qytetarëve evropianë duhet të jesh në hall të madh.

Shpëtimi Idrizi: Të bën përshtypje kandidimi i Fredi Belerit, është një akt i paprecedentë sepse të marrësh një njeri me rekorde kaq të rënda sa i ka Fredi Beleri, pra një njeri me 3 emra, Fodi, Fredi, Dionis, një njeri i cili ka 3 dënime me burg, njëherë në Greqi për armëmbajtje pa leje, një herë e dënuan nga Gjykata e Vlorës për poshtërim të Republikës së Shqipërisë, ka dhe një dënim të fundit tani nga Gjykata e Shkallës së Parë. Pra, të marrësh një njeri me 3 emra dhe me 3 dënime dhe një njeri që edhe profesionalisht nuk të thotë gjë, nga standardet sepse një njeri që formimin e ka hidraulik, është sfiduese mendoj. Minoriteti grek në Shqipëri ka figura më të mëdha. Të marrësh këtë njeri dhe të ja paraqisësh qytetarëve grekë si kandidatë që t’i përfaqësojë në Parlamentin Evropian, sigurisht që është kontrast dhe është një rast që ka sjellë debate dhe në mediat greke. Sfidues, një akt i paprecedentë, në vazhdën e akteve dispropocionale që Greqia ka mbajtur mbi Shqipërinë me bllokimin në Europë dhe me veton dhe me ndërhyrjet që ka bërë karshi drejtësisë e shqiptarëve. T’i afrosh një njeri të tillë qytetarëve evropianë duhet të jesh në një hall shumë të madh.

Megjithatë, Shpëtim Idrizi, kandidimin e Belerit e sheh një lajm të mirë nga pozicioni i Shqipërisë pasi thotë se ai nuk do të jetë fytyra përfaqësuese e Himarës pasi do të jetë e Greqisë në Parlamentin Europian.

Shpëtim Idrizi: Së dyti, nëse do e shihja nga pozicioni i Shqipërisë, do e quaja një lajm të mirë sepse njeriu i cili ka 3 emra dhe 3 dënime të rënda, është lajm i mirë sepse ky njeri një do të jetë më fytyra përfaqësuese e Himarës sepse do të jetë fytyra përfaqësuese e Greqisë në Parlamentin Europian. Edhe në zgjedhjet që do të kemi në Bashkinë e Himarës, edhe minoriteti grek ka figura intelektuale që mund ta përfaqësonin shumë më mirë se Beleri.

Beleri kandidiat për eurodeputet, Suli: Në sondazhe rezulton me 200-300 mijë vota preferenciale

Sekretari i OMONIA-s, Marin Suli thotë se kryebashkiaku i zgjedhur i Himarës, Fredi Beleri, sipas tij mbahet me dhunë në burg. I ftuar në emisionin “Opinion” në Tv Klan, Suli akuzon drejtësinë shqiptare, për të cilën thotë se mban Fredi Belerin pas hekurave si i burgosur politik.

Marin Suli: Nuk është dënuar për armëmbajtje pa leje në Greqi, është dënuar për mosdijeni për armëmbajtje pa leje. Në Shqipëri është dënuar për poshtërim të simboleve, nuk kanë lidhje. E vetmja gjë është organizim i njerëzve të vinin me autobus. Kjo tjetra pastaj, nuk besoj se ka njeri dyshim që Beleri sot është i burgosur politik. Mbahet me dhunë.

Lidhur me kandidimin e Fredi Belerit si eurodeputet në zgjedhjet evropiane të 9 Qershorit nga partia e djathtë “Demokraci e Re” nga kryeministri grek, Mitsotakis, thotë se kryebashkiaku i zgjedhur i Himarës ka pasur mbështetjen e qytetarëve që sipas tij është demonstruar në bazë të sondazheve.

Marin Suli: Në Greqi funksionon demokracia. Beleri në sondazhet e brendshme dhe në sondazhet që po bëhen në të gjitha mediat, rezulton një njeri me 200-300 mijë vota preferenciale. Për t’u bërë euro-depuetet, duhen nga 200 deri në 250 në bazë të popullsisë. Mitsotakis nuk e ka partinë të vetën. Fillon historia nga propozimi brenda strukturave. Siç tha Idrizi, më vjen keq që do bie dakord me Idrizin, brenda partisë ka edhe kundërshtime për kandidaturën e Belerit që është gjëja më normale.

“Masakra e Peshkëpisë”/ Idrizi: Dosja e Belerit është vjedhur në gjykatë, SPAK e ka fajin që pushon çështjen

Teksa në studion e “Opinion” në Tv Klan po diskutohet për çështjen “Beleri” dhe kandidimin e tij si eurodeputet në zgjedhjet evropiane të 9 Qershorit nga partia e djathtë “Demokraci e Re” nga kryeministri grek, Mitsotakis, Shpëtim Idrizi e ka sjellë fokusin tek ajo që njihet si masakra e Peshkëpisë.

I ftuar në emision, kryetari i PDIU-së, Shpëtim Idrizi ka thënë se nuk mund ta lërë dot mënjanë akuzën e Fredi Belerit për masakrën e Peshkëpisë teksa ka shtuar se dosja për këtë çështje është zhdukur.

Në këtë moment, ka ndërhyrë Sekretari i OMONIA-s, Marin Suli që ka thënë se sipas tij, dosja është zhdukur në Ministrinë e Brendshme. Nga ana tjetër, Idrizi ka fajësuar SPAK-un që nuk po heton zhdukjen e dosjes, ndërsa ka thënë se Prokuroria e Posaçme ka zgjedhur të pushojë çështjen në fjalë.

Shpëtim Idrizi: Nuk e lëmë dot mënjanë akuzën që ky ka për masakrën e Pëshkëpisë.

Marin Suli: Nuk ka akuzë, është e stisur. Ju i pari si deputet duhet të bëni presion që ajo çështje të hetohet dhe të gjenden vrasësit.

Shpëtim Idrizi: Nuk është faji i Belerit, është faji jonë dhe i shtetit shqiptar për qëndrimet që mbajmë sepse e ka hapur 3 herë ky SPAK-u dhe e ka mbyllur sepse Prokuroria shqiptare i ka çuar një letër rekomandimi Prokurorisë së Greqisë për të kuptuar numrat e këtyre 7 kallashnikovëve që ishin aty, Greqia nuk i kthen përgjigje. Është pushuar dosja, por ndërkohë është akt zyrtar që është vjedhur dosja e Belerit në gjykatë.

Blendi Fevziu: Si është vjedhur?

Shpëtim Idrizi: Po, po është zhdukur.

Marin Suli: Jo, po abuzon. Ka humbur në arkivën e Ministrisë së Brendshme dosja me gjithë gëzhojat, me gjithë fishekët e 1995-ës. Po për këtë e ka fajin Beleri?

Blendi Fevziu: Si, dosja e Peshkëpisë është zhdukur?

Shpëtim Idrizi: Fajin e ka ky SPAK-u që kur i zhduket dosja dhe kur nuk i sjellin përgjigje, e pushon çështjen. SPAK kur mbyll çështjen e Belerit, është i mirë. Po kur ky SPAK-u e kap Belerin me 90 vota dhe e çon në gjykatë dhe gjykata për herë të tretë e dënon, paska një SPAK të mirë dhe një të keq.

Marin Suli: SPAK-u ka abuzuar 2 herë me Belerin, në rastin kur i mbylli çështjen e Peshkëpisë, ja mbylli gjoja me parashkrim, nuk mund ta parashkronte diçka që thotë prokurori i çështjes, nuk janë gjetur prova që lidhin personin me faktin penal. Në 1996, po qe se Beleri ka qenë i aftë të zhdukë prova, të vrasë e t’i bëjë të gjitha, si ju del heaspi, edhe në Ministrinë e Brendshme kontrollonte arkivën? Janë zhdukur gëzhojat e fishekëve në ministri.

“Nëse Beleri shpallet i pafajshëm do zgjedhë mandatin e kryetarit të Bashkisë”, Suli: Do heq dorë nga eurodeputet

“Nëse zoti Beleri do të shpallet i pafajshëm, do të jetë kryetar me kohë të plotë i bashkisë së Himarës dhe do të heqi menjëherë dorë nga mandati i eurodeputetit”, kështu është shprehur Sekretari i OMONIA-s, Marin Suli.

I ftuar në studion e emisionit ‘Opinion’ në Tv Klan, Suli u shpreh se Fredi Beleri nëse do të shpallet i pafajshëm do të jetë kryetar i Bashkisë së Himarës me kohë të plotë duke hequr dorë nga mandati i eurodeputetit. Suli u shpreh se Beleri do tëzbatojë vullnetin e himariotëve të cilët e kanë votuar si kryetar bashkie.

Sa i takon mandatit si eurodeputet të Belerit, Suli shprehet se sondazhet janë shumë pozitive dhe praktikisht ai është eurodeputet tashmë.

Shpëtim Idrizi: Më bën përshtypje që njeriu që është dënuar me vendim gjykate, që ka një dënim me burg në Greqi. I dënuar për vjedhje, ajo që më shkon gjithmonë në mendje është që një njeri i akuzuar për masakrën e ‘Peshkëpisë’ ky minoriteti grek përfshirë dhe Suli nuk kishin ndonjë rob tjetër të hajrit aty… Më ngjan një ngjarje pozitive për Shqipërinë që Himara nuk do të ketë më fytyrën e Belerit kurse përfaqësimi evropian i Greqisë do të ketë fytyrën e Belerit.

Blendi Fevziu: Në momentin që Beleri vendoset në listat e eurodeputetëve duhet të japi dorëheqjen dhe të heqë pretendimet për bashkinë se ai nuk është betuar?

Marin Suli: Kushtetuta dhe ligji shqiptarë për zgjedhjen nuk e parashikon sepse nuk mund të parasjhikojë Kushtetuta Shqiptare për europarlamentarët, dhe nuk ka konfirmim. Nëqoftë se shpallet i pafajshëm, dhe eurodeputet.

Blendi Fevziu: Por ligji shqiptarë e ndalon kryetarin e bashkisë të bëj çdo funksion tjetër me përjashtim të mësimdhënies.

Marin Suli: Më lër të ta them se kjo është më interesante që do të të duhet. Nëse zoti Beleri do të shpallet i pafajshëm gjë që më duket shumë e vështirë sepse është investuar vetë zoti Rama, zoti Beleri do të jetë kryetar me kohë të plotë i bashkisë së Himarës dhe do të heqi menjëherë dorë nga mandati i eurodeputetit. Në qoftë se SPAK-u dhe qeveria do i thirrin mendjes që të vijë shteti ligjor zoti Beleri do të zbatojë vullnetin e himariotëve…

Blendi Fevziu: Po si eurodeputet mund të fitojë në zgjedhje?

Marin Suli: Zoti Beleri është praktikisht eurodeputet sepse në sondazhe del shumë mirë. Dhe sikur të bëhet eurodeputet, që besoj do të bëhet brenda fundit të shtatorit dhe sikur zoti Rama të vazhdojë rrugën që ka nisur, zoti Beleri do të jetë i pari eurodeputet që po i prin aspiratës 30-vjeçare të europianëve po vete në parlament. Po nga Himara do t’i vijë fundi edhe pushtetit të Edi Ramës dhe integrimit evropian. Himara ka dy eurodeputet, është rast historik.

“Greqia nuk mund të sillet me Shqipërinë siç është sjellë gjithmonë”, Idrizi: Kemi interesa të ndryshme

Në emisionin “Opinion” në Tv Klan mbrëmjen e sotme u trajtua çështja ‘Beleri’ dhe kandidimi i tij si eurodeputet nga partia e djathtë “Demokraci e Re” nga kryeministri grek, Mitsotakis. I ftuar në studio ishte edhe kryetari i PDIU, Shpëtim Idrizi i cili u shpreh se Greqia tashmë nuk mund të sillet me Shqipërinë siç është sjellë gjithmonë dhe se interesat mes dy vendeve janë të ndryshme.

Idrizi gjatë fjalës së tij u shpreh duhet të fokusohemi në çështje me interes për Shqipërinë ku përmendi, heqjen e ligjit të luftës që Greqia mban me ne, çështjen ‘Çame’ dhe gjithashtu çështjen e pensioneve.

Shpëtim Idrizi: Greqia nuk mund të sillet më me Shqipërinë siç është sjellë gjithmonë dhe siç ka nevojë në politikën e brendshme ta tregojë sepse popujt mund të jenë miq, por shtetet duhet të jemi të qartë kanë interesa dhe interesat e Greqisë janë të kithëta me interesat e Shqipërisë se Shqipëria duhet të mbrojë dhe shtetin shqiptarë dhe interesat e veta. Dhe ajo që ne duhet të bëjmë debat është se kemi nja 8 muaj që merremi me një njeri më 3 emra dhe me tre dënime që është në burg. Ky njeriu që ka poshtëruar Republikën time dhe tënden, ky njeriu ka nja 10 muaj që sillet nëpër studiot tona dhe bëjmë emisione pafund. Blend kur do të bëni ju emision për ligjin e luftës që Greqia mban…

Blendi Fevziu: Kemi bërë mo…

Shpëtim Idrizi: Duhet një ndërgjegjësim dhe presion në mënyrë që Shqipëria mos t’i hyjë historirave jo deti, jo toka, por të zgjidhi çështjen e ligjit të luftës dhe kur do të bëjmë ne emisione për Çamërinë.

Blendi Fevziu: Po e kemi bërë mo disa herë… Edhe Bakllava më keni sjellë nga Çamëria këtu.

Shpëtim Idrizi: Po ti e ke bërë disa herë, por ka nevojë që ne, kemi nevojë që të kuptojë që shoqëria shqiptare, interesin tonë kombëtar të përkthyer në politikë të jashtme ne duhet ta kemi te interesat tonë siç janë heqja e ligjit të luftës që Greqia mban me ne, te zgjidhja e çështjes Çame dhe çështja e pensioneve dhe vetëm duke u ulur në tavolinë ne mund të kemi marrëdhënie të mira me Greqinë ku i pari komunitet bashkë me mua që do marrëdhënie të mira me Greqinë jemi ne Blendi që kërkojmë të kthehemi në vendin tonë…

Blendi Fevziu: Në Greqi?!

Shpëtim Idrizi: Po, sigurisht që nuk i ndryshojmë kufinjtë mos trembeni, por ama shtëpinë e babës e të gjyshit tim e dua se e kam dhe e shoh nga kufiri dhe kur flitet për të drejtat e njeriut nuk mundet që të amnistojmë një burgaxhi tre herë, me të drejtat e shqiptarëve të Çamërisë.

/tvklan.al

IMAZHET E PABESUESHME TE ’97!

Skandal në Premier League, 2 futbollistë arrestohen për përdhunim

Arritje e re në shkencë, shpiken bateritë që karikohen brenda pak sekondave

Basha sulmon Metën: Pazarxhi, nxitësi i djegies së mandateve

Dhomë për turistët, vetëm nëse je i licensuar

“780 të dënuar lënë sot burgun”, Manja mesazh përfituesve të amnistisë penale: Mos e ktheni më kokën mbrapa!

“Ti nuk je nëna…”, çfarë i tha stërgjyshja të bijës që rrëmbeu nipin 3-vjeçar

Shuhet tragjikisht në aksident 25-vjeçari shqiptar në Itali, ishte baba i një vajze të vogël

Vjehrrit i morën fëmijën, ekspertet: Bravo nuses, nuk i hodhi benzinë zjarrit

Arrestohet senatorja demokrate gjatë një tentative grabitjeje

Humbi jetën duke punuar në Maltë, kush është 51-vjeçari nga Librazhdi që e zuri çatia poshtë