Ekonomia shqiptare “mbahet në këmbë” nga ndërtimi dhe pasuritë e palujtshme. Konsumi u rrit vetëm me 4%
Rritja ekonomike ka vijuar të mbetet e dobët dhe në tremujorin e dytë të vitit, duke reflektuar konsum të dobët, pavarësisht rritjes së numrit të turistëve. INSTAT bëri të ditur se Produkti i Brendshëm Bruto (P.B.B) në tremujorin e dytë të vitit 2023 vlerësohet me rritje prej 3,23%, kundrejt tremujorit të dytë të vitit 2022. Edhe në tremujorin e parë zgjerimi ekonomik ishte ngadalësuar, duke arritur në 2.83%.
Ndërtimi dhe pasuritë e paluajtshme po vijojnë që të mbajnë në këmbë ekonominë. Sipas raportit të INSTAT, degët kryesore të ekonomisë, për tremujorin e dytë të vitit 2023, krahasuar me tremujorin e dytë të vitit 2022, janë Aktiviteti i Ndërtimit pati një rritje me 14,61%, pasuar nga Aktiviteti i Pasurive të Paluajtshme që ka shënuar një rritje prej 11,72 %. Edhe aktiviteti i shërbimit për periudhën Prill-Qershor, ka patur një rritje me mbi 12%. Ndërsa në rënie janë Aktiviteti i Bujqësisë, Pyjeve dhe Peshkimit më rënie 0,04 %, dhe Aktiviteti i Industrisë, Energjisë dhe Ujit me një rënie me 2,37 %.
Edhe pse Shqipëria shënoi një rritje të ndjeshme të numrit të turistëve që në tremujorin e dytë, konsumi i popullatës mbetet i dobët.
Konsumi final i popullatës, i cili përbën peshën kryesore të shpenzimeve në ekonomi sipas INSTAT u rrit me 4,03% në krahasim me tremujorin e dytë të vitit 2022. Sa i përket konsumit final të qeverisë u shfaq me një rritje mbi 9%. Ndërsa Eksportet e mallrave dhe shërbimeve u ulën me 1,48%, duke thelluar humbjet e këtij sektori për shkak të rënies së Euros, ndërsa importet e mallrave dhe shërbimeve u rritën me 2,42%.
RRITJA EKONOMIKE PËR 2023
Tremujori I 2.83%
Tremujori II 3,23%
DEGËT SIPAS RRITJES EKONOMIKE
Aktiviteti i ndërtimit 14,61 %
Pasuritë e Paluajtshme 11,72 %
Aktiviteti i shërbimit 12,37 %
Bujqësisë. Pyeje dhe Peshkim – 0,04 %
Industri, Energji dhe Uji – 2,37 %
KOMPONENTET KRYESORE TË PBB
Konsumi final i popullatës + 4,03 %
Konsumi final i qeverisë + 9,29 %
Komponenti i Formimit bruto të kapitalit fiks +11,05 %
Eksportet e mallrave dhe shërbimeve -1,48 %
Importet e mallrave dhe shërbimeve + 2,42 %
Klan News