Interpoli e Ministria e nxjerrin të pastër, prokurori bllokon anijen turke


Interpoli e Ministria e nxjerrin të pastër, prokurori bllokon anijen turke

21:01 18/06/2020

Në 25 gusht 2019 anija turke me vela “Libertas” bllokohet me një urdhër nga Interpoli. Në bordin e saj ishte kapiteni dhe dy turistë rusë.

Informacioni për bllokimin e anijes kishte ardhur për shkak të një denoncimi nga një shtetase turke, e cila pretendonte se pas vdekjes së babait të saj, anija me vela ishte zhdukur. Por babai i saj ia kishte shitur anijen një kompanie private, Hakan Kucukoglu. Përfaqësuesi i kompanisë “Acqua Marinë” në Turqi tregon gjithçka për emisionin “Stop” duke theksuar se ky keqkuptim u sqarua.

Por prokuroria e Sarandës dhe prokurori Ilir Hoxha, prej 9 muajsh e mban të bllokuar anijen me vela. Dëmi më i madh nga kjo histori iu bë kapitenit, i cili mbahet i bllokuar në Sarandë, prej gati një viti.

Devrim Ugurlar thotë, se nuk i jepet asnjë shpjegim nga prokurori Ilir Hoxha dhe ai është detyruar të strehohet në një familje, që e mban me ushqim.

Emisioni “Stop” ka mundur që të zbardhë të gjithë problematikën e anijes me vela, “Libertas”. Ne kemi siguruar dokumente nga ambasada turke, por edhe nga Interpol. Të dy këto institucione pohojnë se problematika dhe pretendimi i 25 Gushtit për anijen “Libertas” nuk qëndrojnë, kjo anije është e lirë të lundrojë dhe as kapiteni nuk ka asnjë lloj penaliteti në lidhje me këtë problematikë.

Këshilltari i ministrisë turke, një shqiptar nga Prizreni, i cili është në brendësi të çështjes, pohon, se shteti dhe Interpoli turk ka dërguar dy shkresa, që sqarojnë situatën dhe kërkojnë lirimin e kapitenit dhe anijes, por prokurori Ilir Hoxha nuk po e mundëson këtë.

Gazetari- Përshëndetje!

Këshilltar i Ministrisë së Jashtme turke- Përshëndetje!

Gazetari- Si kaluat?

Këshilltar i Ministrisë së Jashtme turke -Mirë faleminderit!

Gazetari- Gëzohem! Jam gazetari i emisionit “Stop”, në “Tv Klan”.

Këshilltar i Ministrisë së Jashtme turke –Urdhëroni?!

Gazetari-Po intersohemi, në lidhje me një çështje, që unë kam informacione, që ju jeni në brendësi, për një anije me vela “Libertas”, e cila është bllokuar në Sarandë në 25 gusht të 2019-ës.

Këshilltar i Ministrisë së Jashtme turke – Po!

Gazetari- Unë thjesht doja, që të konfirmoja faktin, pas gjithë korespondencës, që keni pasur ju si institucion me shtetin turk, çfarë është konstatuar, në lidhje me këtë anije?

Këshilltar i Ministrisë së Jashtme turke – Kjo anije nuk ka ndonjë problem. Që të them një problem, s’e kam.

Gazetari- Juve e keni dërguar gjithë dokumentacionin në prokurorinë e Sarandës, ku tregon, që kjo anije nuk ka as edhe një lloj problemi dhe nuk duhet të mbahet e bllokuar?

Këshilltar i Ministrisë së Jashtme turke – Po, po! Unë me Interpol kam fol. Me Interpol të Turk-ies. Ja kena shkru në letra, ja kena çu, që s’ka kurrgja. Prokurori ka thënë, unë prej Turk-ies prej…gjykatësit, po dun letër. Po s’ka në Turki një gjykatë…

Gazetari- E kuptoj.

Këshilltar i Ministrisë së Jashtme turke – Se me Interpolin e kena bo kët punë. Interpoli apet e ka çu lejen, që lëshojeni këtë anije, se s’ka problem. Hala s’po e lshojnë. Një letër nga ambasada e Turk-ies, e kena shkru Prokuorisë Sarandë.

Gazetari- Po?!

Këshilltar i Ministrisë së Jashtme turke – Ky tani në Interpol e kena ndalu. A është ashtu?

Gazetari- Po, po!

Këshilltar i Ministrisë së Jashtme turke – Apët në Interpol, lshojeni i kena thënë, po hala s’po e lshojnë.

Gazetari- Me Interpol e bllokuan, me Interpol duhet ta zhbllokojnë!

Këshilltar i Ministrisë së Jashtme turke – Po qashtu është kjo punë.

Gazetari- Metin, ju çfarë pozicioni keni në ambasadën Turke?

Këshilltar i Ministrisë së Jashtme turke –Unë këshilltar i punëve të brendshme i ministrisë jam.

Gazetari- Të ministrisë së jashtme, Turke?

Këshilltar i Ministrisë së Jashtme turke –Po, punët e brendshme të Turkisë Unë jam, që 10 vjet, që në Turki jena.

Gazetari- E kuptoj, e kuptoj!

Këshilltar i Ministrisë së Jashtme turke –Në Turki jam, kan Dajrektor. Më fal, se shqipen mirë s’e kam, që në 10 vite, që jena na n’ Turki.

Gazetari- Kuptohesh shumë mirë.

Këshilltar i Ministrisë së Jashtme turke –Shumë faleminderit, ditën e mirë!

Çështjen e varkës me vela e ka prokurori i Sarandës, Ilir Hoxha, i cili ka bllokuar në mënyrë të habitshme kapitenin e kësaj anijeje duke e lënë për 9 muaj në qytetin e Sarandës dhe duke i mohuar lirinë. Ky prokuror nuk ka marrë parasysh se me çfarë dhe si do të jetojë ky shtetas i huaj. Emisioni “Stop” ka mësuar nga ambasada turke, por edhe nga Interpoli turk se në prokurorinë e Sarandës ka mbërritur shkresa se kapiteni është i pafajshëm, por edhe se dokumentacioni i varkës nuk ka më probleme. Tani lind pyetja: Pse prokurori Ilir Hoxha nuk e mbyll këtë çështje?

Përmes kamerës së fshehtë, “Stop” merr versionin e prokurorit, i cili pretendon se kapitenin po e mashtrojnë, pasi nuk ka ardhur asnjë informacion nga Turqia dhe çështja është në vend-numëro.

Denoncuesi- Si jeni?

Prokurori Ilir Hoxha-Mirë faleminderit!

Denoncuesi- A mund të hyjmë?

Prokurori Ilir Hoxha-Po ti erdhe, mua ça më kushton, mu më duhet vetëm…

Denoncuesi-Elvisi!

Prokurori Ilir Hoxha-Për të njëjtin problem të turkut.

Denoncuesi-Po!

Prokurori Ilir Hoxha-Jemi në të njëjtin status, në të njëjtin stad, siç kemi qenë.

Denoncuesi-  I kanë…më duket, se i kam shkrujt edhe unë, ça dokumenta.

Prokurori Ilir Hoxha-Tani jemi në të njëjtin stad, të tjerët mund t’ju thonë, ça të duan. Mua nuk më interesojnë të tjerët. Jemi në të njëjtin stad bashkë.

Denoncuesi-Dakord, unë vetëm thjesht…

Prokurori Ilir Hoxha-Sqaroje zotërinë, se jemi në të njëjtin stad me Hallaçin, me Besmir Hallaçin e ambasadës.

Denoncuesi- Ok, në rregull!

Prokurori Ilir Hoxha-S’kemi ndryshime.

Denoncuesi- S’ka ndryshime fare? As dokumenta, asnjë gjë?

Prokurori Ilir Hoxha- Të tjerat janë thashetheme, për të prish punë.

Denoncuesi- Ok!

Prokurori Ilir Hoxha-Më kupton?

Denoncuesi- Vetëm thjeshtë, ai ngaqë don d.m.th, që të dijë.

Prokurori Ilir Hoxha-Ai i ka bërë. Duhet të vetë interesohet, të jetë në rregull, të më informojë për të tëra, që jam në ndjekje të kësaj.

Denoncuesi- Tjetër pastaj, s’dihet gjë.

Prokurori Ilir Hoxha- Hajd!

Denoncuesi- Gjithë të mirat!

Prokurori Ilir Hoxha-Flasim!

Denoncuesi-Punë të mbarë! /tvklan.al



Të ngjashme