Kryeministri i Kosovës Bujar Bukoshi, në periudhën 5 Tetor 1991 deri më 1 Shkurt 2000, ka qenë një prej personazheve të ftuar në emisionin “E Diela debat”, në Tv Klan. Gjatë intervistës përballë Blendi Fevziu, Bukoshi flet për situatën e tensionuar mes Kosovës dhe Serbisë më 1999, teksa e përshkruan atë si dramatike. 

“Kosova i ka punët pisk

“, thotë ai në intervistë.

Televizioni Klan sjell intervistën ekskluzive të Bujar Bukoshit, i cili tregon se deri në momentin e intervistës, numri i të vrarëve ishte në mbi 2.000 njerëz, ndërkohë që dëmet materiale sipas tij ishin të tmerrshme dhe largimet nga Kosova ishin masive.

Intervista e plotë me Bujar Bukoshin

Blendi Fevziu: Të nderuar teleshikues mirëmbrëma. Ju flas nga studio e Tv Klan nga emisioni “E Diela debat”. Natyrisht emisioni u zhvillua dhe dy ditë më parë dhe ju ndoqët intervistën time me Zotin Skënder Gjinushi, kryetar i parlamentit shqiptar. Megjithatë zhvillimet mjaft të vrullshme dhe mjaft intensive të dy viteve të fundit lidhur me problemin e Kosovës dhe një seri vizitash të përfaqësuesve më të lartë politikë të Kosovës në Tiranë në ditët e fundit na kanë rikthyer përsëri në këtë studio. I ftuari im për sot është Kryeministri i Republikës së Kosovës, Zoti Bujar Bukoshi, një nga personalitetet e njohura të jetës politike në Kosovë, por edhe një nga politikanët e njohur kosovarë në Shqipëri gjatë gjithë këtyre viteve, pra nga 1991 e në vazhdim, ai ka qenë i pranishëm disa herë në Tiranë. Unë dua t’ju falenderoj që ndodheni sot në studio. Faleminderit Zoti Bukoshi që e pranuat ftesën. Ju vë në dijeni se ai ka qenë edhe një herë i ftuar përmes linjës telefonike në një nga debatet që ne kemi zhvilluar për problemet e Kosovës, ku ka marrë pjesë ministri i Jashtëm dhe përfaqësues të forcave opozitare në Mars të vitit të kaluar. Siç e keni vënë re ka patur një intensitet të lartë vizitash të politikës kosovare. Kjo ka ngritur pikëpyetjen se përse ndodhen pikërisht tani në Tiranë, si shpjegohet që në 5 ditë, 3 personalitete të lartë të Kosovës janë ndodhur këtu dhe është konfirmuar ftesa e presidentit Mejdani për presidentin e Kosovës Ibrahim Rrugova. Për të zbardhur gjithë këtë enigmë, e cila ka patur disa komente në shtyp, të cilat asnjëherë nuk janë të plota kemi këtu Zotin Bukoshi.

Zoti Bukoshi unë besoj që biseda jonë sot është e lirshme dhe do të përqendrohet në marrëdhëniet Kosovë-Shqipëri. Pyetja që do t’iu bëj është paksa më e përgjithshme dhe ka të bëjë me vizitat. Unë e thashë edhe më herët që në 5 ditë, 3 personalitete të larta të Kosovës, madje të kaheve të ndryshëm politikë kanë vizituar Tiranën. Çfarë do të thotë kjo? Cili është motivi i këtyre vizitave?

Bujar Bukoshi: Atëherë ta them shkurt. Unë konsideroj se kjo është një dramë në Kosovë që ka zgjatur shumë dhe sipas gjasave do të zgjasë edhe më shumë, por aktualisht Kosova i ka punët pisk dhe kjo hetohet tek të gjithë aktorët politikë të Kosovës.

Blendi Fevziu: Megjithatë, çfarë po ndodh konkretisht? Ka patur edhe vizita të tjera në Tiranë dhe Zoti Demaçi dhe Zoti Qosja dhe ju, keni qenë disa herë. Pse konkretisht tani në këto 5 ditë ju keni qenë në Tiranë? A po ndodh diçka, a po formulohet një pakt, një marrëveshje, çfarë po ndodh konkretisht?

Bujar Bukoshi: Janë përpjekjet për të formuluar një marrëveshje mes të gjitha forcave dhe subjekteve politike në Kosovë për shkak të gjendjes në të cilën gjendet Kosova edhe për shkak të kundërshtarit tonë, të cilin ne nuk po e harrojmë. Jemi në një situatë që kemi të bëjmë me një agresion të rrezikshëm, me një platformë të caktuar për shfarosjen e shqiptarëve dhe kjo i ka mobilizuar shqiptarët, ndoshta edhe me komponentë instiktivë. Këtë e hetojnë qytetarët e Kosovës. Ata në mënyrën e tyre bëjnë presion dhe kjo është si një formulë matematikore.

Blendi Fevziu: Duke ndjekur bisedën tuaj pata përshtypjen që donit të thoshit që kontradiktat politike brenda Kosovës shpeshherë kanë ngjallur më shumë vëmendje se sa rreziku potencial kryesor, që është agresioni serb.

Bujar Bukoshi: Po, ajo më shumë i ngjan një strategjie, ku përqendrohet vëmendja në disa fenomene që janë të dorës së dytë tani, që nuk janë esenciale dhe nuk përfaqësojnë realitetin në Kosovë. Realiteti në Kosovë është i hidhur sepse është gjendja e rëndë atje, ndërsa skena politike e Kosovës është me fërkime me rivalitete e me interesa të ndryshme.

Blendi Fevziu: Në këtë konfiguracion politik të Kosovës me rryma kundër rrymave, cili është roli i qeverisë shqiptare? Këto takime po bëhen në Tiranë, nuk ka më një ndërmjetës ndërkombëtar siç është përpjekur të bëhet në disa raste. Cili është roli i qeverisë shqiptare në këtë rast?

Bujar Bukoshi: Roli i qeverisë shqiptare konsiston në faktin se është edhe disponimi i shtetit shqiptar dhe shoqërisë shqiptare që është i disponueshëm që të merret me Kosovën. Punët janë të pandashme dhe kjo po shihet tani. Kosova është pjesë përbërëse e çështjes së pazgjedhur shqiptare në Ballkan dhe me këtë tani po ballafaqohet edhe shteti shqiptar. Mendoj se është pozitive kjo që po ndodh, sepse hetohet një angazhim rreth saj.

Blendi Fevziu: Ju thatë pak më parë se ka disponim të qeverisë shqiptare për të arritur një marrëveshje midis forcave politike në Kosovë, a mendoni se ju ka munguar ky disponim i qeverisë shqiptare?

Bujar Bukoshi: Jo, nuk ka munguar. Të gjitha qeveritë shqiptare në esencë nuk kanë patur pretendime që të vënë diktat me Kosovën. Ma merr mendja se Kosova e ka identitetin e saj politik, një elitë politike, një udhëheqje që është legjitime. Po bën disa punë në kuadrin e mundshëm të saj dhe ka edhe variante dhe njëanësa, por nuk ka një qasje të gabueshme mendoj.

Blendi Fevziu: Nëse ky moment politik që ju e quani imperativ do të kushtëzonte uljen në një tryezë, ju mendoni se do të jetë e mundur një ulje në tryezë e Demaçit, e Qoses, Rrugovës dhe natyrisht e juaja?

Bujar Bukoshi: Më shumë ta quaj si trekëndësh këtë. Unë prezantoj qeverinë e Kosovës dhe qeveria e Kosovës është krahu ekzekutiv i politikës. Aktualisht vendimet politike në Kosovë kryesisht deri tani kanë qenë të marra nga Rrugova dhe tani gjërat janë komplikuar pak për shkak të kontestimit të politikës së Rrugovës. Tani është situata e atillë që duhet të takohemi dhe të bisedojmë dhe të bëjmë një platformë të përbashkët, përndryshe do ta pësojmë të gjithë.

Blendi Fevziu: Sot, shtypi shqiptar ka dhënë njoftimin që kjo tryezë, nëse mund të mendohet kështu, do të bëhet në prezencën dhe patronazhin e Presidentit shqiptar, Zotit Mejdani. A keni dijeni ju për këtë?

Bujar Bukoshi: Unë kam dijeni se Presidenti Mejdani i ka dërguar ftesë edhe Presidentit Rrugova për një takim të tillë për konsultime. Unë dje e kam takuar Presidentin Mejdani, kemi patur një bisedë rreth situatës në Kosovë. Unë e vlerësoj si shumë të mirë këtë iniciativë të Mejdanit, por nga ana tjetar kam një përshtypje që perceptohet një dramë e madhe nëse do të takohen liderët e Kosovës. Kam përshtypjen se ekzagjerohet pa të keq. Esenca e problemit është Serbia, fashizmi serb. Përsa i përket tryezës dhe formës që do të ketë ajo, është më pak relevante.

Blendi Fevziu: Por deri më sot kjo tryezë ka munguar Zoti Bukoshi? A e quani këtë një handikap të politikës kosovare?

Bujar Bukoshi: Po, e quaj patjetër. Kjo nuk është një gjë e re tek shqiptarët, por mendoj se sensi për këtë situatë tani është i pranishëm tek të gjithë aktorët e politikës kosovare dhe mendoj se do të tejkalohet kjo. Nuk kam shumë pretendime të profetizoj se si do të përfundojë kjo, nuk jam fort i preukupuar me ritualin, sesa me esencën e një vullneti politik tek të gjithë. Kjo po imponohet, deshën apo nuk deshën shqiptarët, është luks i madh të shpenzohen energji rreth kësaj dileme.

Blendi Fevziu: Çfarë doni të thoni me deshën apo nuk deshën shqiptarët? Ka qenë një faktor i tretë që e ka imponuar këtë?

Bujar Bukoshi: Faktori që imponon është agresioni serb në Kosovë.

Blendi Fevziu: Unë kam parasysh që në zyrën e Rrugovës janë depozituar vazhdimisht që nga viti 1997, që nga ardhja në fuqi e një force të re politike disa ftesa dhe ai nuk i është përgjigjur pozitivisht këtyre. A mendoni se ka ardhur rasti që ai të vizitojë Tiranën pas një mungese gati 2-vjeçare?

Bujar Bukoshi: Me sa di unë Rrugova nuk ka dhënë asnjë arsye qoftë zyrtare apo publike apo jozyrtare se ka një motiv specifik që të mos vijë. Unë nuk do doja të spekuloja për arsyet, por besoj se ky takim do të organizohet dhe do të bëhet.

Blendi Fevziu: Kur mendoni se mund të realizohet ky takim?

Bujar Bukoshi: Të shohim, ftesa është dërguar.

Blendi Fevziu: Mendoni se duhet të jetë shpejt?

Bujar Bukoshi: Duhet të jetë.

Blendi Fevziu: A mendoni se nga ky takim politika e Kosovës do të dalë me një qëndrim politik? Sepse komuniteti ndërkombëtar deri më sot ka nënvizuar që për problemin e Kosovës gjëja më e vështirë janë disa qëndrime të ndryshme politike. A mendoni se mund të unifikohet qëndrimi politik?

Bujar Bukoshi: Qëndrimi politik i të gjitha forcave dihet, ka konsensus. Po kërkohet unitet rreth një statusi për Kosovën që është nën vullnetin politik të artikuluar të popullit të Kosovës rreth statusit të Kosovës. Kjo nuk është edhe aq tragjike mendoj unë. Por në këtë sens, kjo është punë që mund të menaxhohet.

Blendi Fevziu: Kjo ka qenë një nismë personale e ndonjë politikani shqiptar apo është në përgjithësi e parlamentit shqiptar?

Bujar Bukoshi: Kjo ka lindur më shumë si reagim natyror. Kjo është edhe kërkesë që shtrohet nga qytetarët e Kosovës që të gjendet një qëndrim. Edhe më parë ka patur fërkime, duele në shtyp, akuza dhe kundërakuza, por këto nuk mund të jenë primare.

Blendi Fevziu: Megjithatë në këtë tentativë të të gjitha forcave politike në Kosovë për t’u unifikuar për një takim të mundshëm në Tiranë apo nuk e di ku, si ka reaguar komuniteti ndërkombëtar? A keni patur sinjale prej tyre?

Bujar Bukoshi: Po, ata kërkojnë që shqiptarët e Kosovës të flasin me një zë herë, herë edhe me presione. Por nuk ka asgjë të keqe, është edhe në interesin tonë që ta bëjmë këtë dhe ta plotësojmë edhe këtë kusht për Pavarësinë e Kosovës nëse ka mbetur puna aty. Unë mendoj se nuk është puna aty. Është një pretekst, një alibi politike edhe për diplomacinë ndërkombëtare për të arsyetuar atë që nuk po bën për Kosovën.

Blendi Fevziu: Ndërkohë që ju më thatë reagimin ndërkombëtar, cili është reagimi i politikës serbe ndaj këtij takimi të mundshëm?

Bujar Bukoshi: Nuk jam duke ndjekur intensivisht politikën serbe, sepse edhe aty ekziston një kakofoni, por edhe në qarqet e pushtetit serb. Ma mer mendja se do të ishin të shqetësuar nëse shohin që faktori shqiptar po forcohet, ose Kosova po faktorizohet. Kjo është parë, por kjo nuk është temë preukupuese se çfarë mendojnë ata, por se çfarë po bëjmë ne.

Blendi Fevziu: Zoti Bukoshi sa e mundshme është përfshirja e Ushtrisë Çlirimtare të Kosovës në qeverinë e Kosovës?

Bujar Bukoshi: Qeveria është duke bërë të gjitha përpjekjet që faktori ushtarak i Kosovës të organizohet, të fuqizohet, por edhe të institucionalizohet. Qeveria ime është duke u përpjekur që të japë kontributin e saj dhe mendoj se UÇK është faktor shumë i rëndësishëm.

Blendi Fevziu: A mendoni se ka forca që janë kundër këtij unifikimi, të integrimit të UÇK në qeverinë e Kosovës? Kam parasysh që në mënyrë të tillë është komentuar edhe vrasja e njërit prej ministrave të qeverisë tuaj, Zotit Krasniqi, në Tiranë rreth 3 muaj më parë.

Bujar Bukoshi: Mund të thuhet që ka forca që janë të interesuara që këto punë të mos shkojnë mirë, por unë nuk kam prirje të zhvilloj teori komploti. Është për t’u shqetësuar që disa grupime bëjnë disa me vetëdije, apo pa vetëdije veprime kundër.

Blendi Fevziu: A keni ndonjë pistë që po hetoni ndaj vrasjes së ministrit tuaj? Keni ndonjë dyshim?

Bujar Bukoshi: Kemi indicione, kemi faktografinë tonë. Pas vrasjes së Ahmet Krasniqit ne i jemi drejtuar qeverisë shqiptare dhe presim rezultatet e hetimeve. Jemi duke bashkëpunuar për rezultatet përfundimtare.

Blendi Fevziu: Pra keni bashkëpunim me Tiranën zyrtare për të gjetur pistat e mundshme?

Bujar Bukoshi: Tirana zyrtare është e angazhuar në këtë drejtim dhe nuk ka pengesa.

Blendi Fevziu: Meqë jemi tek Ushtria Çlirimtare e Kosovës, a mendoni se është e krahut të ashpër politik dhe mund të pranojë përfaqësimin politik të Ibrahim Rrugovës? Një personalitet që deri më sot ka qenë për politikën paqësore.

Bujar Bukoshi: UÇK duhet të pranojë përfaqësimin politik të të gjitha forcave politike të Kosovës dhe jo veç e veç. Është e gabuar të bëhet një trajtim i tillë me posesivitet. UÇK është një reaksion në provokacion serb shumëvjeçar dhe nuk është kreaturë e ndonjë partie politike. Tashmë kjo pretendohet për licencë, por është gabim. UÇK do të thotë, djemtë e Kosovës dhe ndërsa ne bisedojmë këtu disa prej tyre kanë zënë pozicionet dhe mbron Kosovën, sakrifikohet për të. Gjërat duhet të mos ngatërrohen.

Blendi Fevziu: Sa mendoni se është forca potenciale e UÇK aktualisht? Sa përqind të Kosovës vijon ta kontrollojë kjo forcë?

Bujar Bukoshi: Ndoshta flas me terma ushtarakë për të cilët nuk jam kompetent. UÇK nuk kontrollon sot territor në Kosovë. UÇK pas ofensivës së verës ka filluar të ristrukturohet, ka nxjerrë mësime nga pësimet, është forcë potenciale për t’u respektuar.

Blendi Fevziu: A mendoni se pranverën e ardhshme do të ketë zhvillime të reja ushtarake në Kosovë?

Bujar Bukoshi: Unë mendoj se është gabim të deklarohet një datë tani. Ndoshta s’do ta presim verën sepse po shohim që disa gjëra kanë filluar simptomat dhe nuk ka ndonjë ditë soleme. Ne kemi ofensivë të përditshme atje, mendoj se Serbia është e interesuar të mos e presë pranverën, do ta kryej punën sa më shpejt në Kosovë.

Blendi Fevziu: Zoti Bukoshi, është thënë që një pjesë e UÇK kontrollohet nga grupe nacional marksiste. Kryesisht të disaporës kosovare, është e vërtetë kjo?

Bujar Bukoshi: Unë nuk kam bërë hulumtime, por kjo është evidente dhe mendoj se këtu është edhe gabimi. Me lindjen e Ushtrisë Çlirimtare të Kosovës populli u ngrit të mbrojë vetveten, por politika nuk u tregua në nivel që të merrte përgjegjësitë. Edhe në politikë është si në fizikë, kur krijohet vakumi ndërhyhet.

Blendi Fevziu: Pra ju e konsideroni defekt të politikës së Kosovës?

Bujar Bukoshi: Po, për motive të një konkurrence. Edhe hezitimet në politikë në momente të caktuara kushtojnë.

Blendi Fevziu: Ka kontradikta mes UÇK dhe Forcave të Armatosura të Republikës së Kosovës?

Bujar Bukoshi: Jo nuk ka kurrfarë kontradikte me ato oficerë që kanë shërbyer në armatën jugosllave dhe kanë ardhur nga jashtë, nga perëndimi dhe luftojnë bashkë me UÇK. Nuk ka asnjë problem. Ka probleme me manipulatorët rreth Ushtrisë Çlirimtare të Kosovës.

Blendi Fevziu: Një nga ato pyetjet më interesante që unë ia kam bërë edhe Zotit Suroi ka të bëjë me legjitimitetin e zgjedhjeve të 22 Marsit 1998. Dihet që në momentet e një terrori dhe një ofensive të gjerë serbe, thuajse 97% i dha mandatin zotit Ibrahim Rrugova. A mendoni se zhvillimet politike të këtij viti e kanë zhvlerësuar votën e 22 Marsit? Dhe parashikohen zgjedhje të reja?

Bujar Bukoshi: Ndoshta pjesërisht po, por kur është fjala te legjitimiteti nuk ka aparat që të matet.

Blendi Fevziu: Dhe ju e përmendët pak më parë që ka një lloj zhvleftësimi të politikë së Zotit Rrugova…

Bujar Bukoshi: Është kontestuar, nuk është gjë sekrete. Kjo udhëheqje e deritanishme e Kosovës dhe ajo çfarë u arrit është evidente dhe lidhur me këtë, derisa kontestohet duhen bërë edhe ndryshime. Nuk duhet të harrojmë procedurat.

Blendi Fevziu: Ju mendoni se mund të ndodhin zgjedhje të parakohshme?

Bujar Bukoshi: Mendoj se në këto rrethana nuk ka kushte, sepse do të ishte paradoksale që në një vend të okupuar të bëhen këto veprime.

Blendi Fevziu: Në rast se këto zgjedhje mund të ndodhin, cilët shikoni si kandidatët më të mundshëm për të konkurruar Zotin Rrugova?

Bujar Bukoshi: Siç po shihet është Zoti Demaçi dhe Zoti Qose.

Blendi Fevziu: Ju vetë nuk keni ndërmend të merrni pjesë?

Bujar Bukoshi: Jo, nuk kam pretendime të bëj karrierë, por siç dihet ne kemi filluar me një qëllim, që të bëjmë diçka për Kosovën. Dhe përsa i përket qeverisë së Kosovës, ajo është e gatshme që me çdolloj kombinimi dhe çfarëdo marrëveshje të japë kontributin me gjithçka që ka.

Blendi Fevziu: Desha t’iu pyes edhe për dallimet mes Qoses, Demaçit dhe Rrugovës. Si mund t’i përcaktonit ju dallimet politike?

Bujar Bukoshi: Rrugova i është përmbajtur kredos politike se çështja e Kosovës për pavarësinë duhet të arrihet në mënyrë paqësore. Në fillim nuk kontestohej kjo, por kur u pa se politika e Rrugovës u tregua pasive, nuk e kishte përkrahjen nga faktori ndërkombëtar dhe kjo nuk pati rezultat. Tani dolën në skenë forca të tjera politike. Nëse ndërmerren aksione dhe aktivitete pa përdorur dhunën.

Blendi Fevziu: Në shtypin shqiptar janë komentuar shpesh edhe kontradiktat që keni patur ju me Zotin Rrugova. A kanë qenë reale këto, apo thjeshtë komente gazetash?

Bujar Bukoshi: Nuk kanë qenë kontradikta esenciale thelbësore, por kanë qenë si rezultat i një realiteti. Rrugova si kryetar i Republikës së Kosovës ka patur qeverinë e tij dhe qeveria ndeshet me punë konkrete dhe disa punë nuk shkojnë siç duhet. Dhe në këtë relacion janë bërë vërejtjet, të cilat nuk kanë munguar. Ka patur edhe nga ato gjëra ku është shprehur kontestimi i qeverisë, ka patur akuza dhe kundërakuza, por gjithçka është bërë që të arrihet diçka.

Blendi Fevziu: A besoni se ndonjë forcë politike serbe mund të kontestojë politikën e Beogradit, të Millosheviçit?

Bujar Bukoshi: Tani për tani nuk besoj dhe nuk shpresoj.

Blendi Fevziu: Pra ju nuk do të keni asnjë mbështetje nga progresistët?

Bujar Bukoshi: Në kalkulimet politike janë tjetër gjë dëshirat. Ne do të donim që në Serbi disa lëvizje të fuqishme, megjithëse nuk mund të parashikohet. Tani gjithçka flet, në çdo parametër. Serbia nuk ka opozitë, ajo është dekapituar dhe nuk ka simptoma që është në horizont. Mendoj se është humbje kohe dhe gabim që politika e Kosovës në strategjinë e saj të bazohet në këtë faktor që është imagjinar.

Blendi Fevziu: Radikalizimi i situatës dhe shkuarja drejt ndeshjes të armatosur a nxjerrë jashtë loje G-15, grupin e kontaktit?

Bujar Bukoshi: Tani ai grup është zvogëluar fare dhe praktikisht është ezauruar. Puna është që nëpërmjet një konsolidimi të arrihet një platformë e përbashkët dhe në bazë të saj të formohet një grup negociatorësh që do të punojnë, pasi para nesh është një betejë.

Blendi Fevziu: Dje në një intervistë që ju keni dhënë në edicionin informativ të disa televizioneve jeni shprehur se objektivi i vetëm i Kosovës është pavarësia. Ndërkohë nga ana tjetër jeni shprehur se duhet bërë gjithçka për të shmangur luftën, a ka këtu një paradoks?

Bujar Bukoshi: Jo, unë nuk shoh një paradoks. Objektivi i shqiptarëve të Kosovës është pavarësia, jashtë sundimit serb. Kur shohim një rrezik konkret, duhet bërë gjithçka që ai rrezik të shmanget, pa ra në kolegjion me objektivin thuhet të shohin që ta eleminojmë këtë rrezik dhe të meremi me të, qoftë edhe të bëhet një standby i atij objektivi që ne kemi për detyrë të jemi të qartë dhe të mos shesim demagogji duke e bërë pavarësinë një rrugë të thjeshtë. Ajo do të jetë një rrugë e gjatë, një maratonë, në kuadër të saj të punohet në mënyrë konkrete se si të ndalet agresioni.

Blendi Fevziu: A ndjeni dallime në platformat politike të qeverisë Nano me qeverinë Majko lidhur me qëndrimin ndaj Kosovës, shihni një diferencë?

Bujar Bukoshi: Në platformë jo, por kur bëhen ndryshime një konotacion i ri është, por nuk shoh ndryshime të mëdha.

Blendi Fevziu: Si e shikoni sot pas një viti takimin Nano-Millosheviç?

Bujar Bukoshi: Atëherë qeveria ime ka dalë në një deklaratë. Nuk kemi shprehur entuziazëm, ne kemi patur kontakte të shumta me Nanon. Zhvillimet lëvizin me ritme të shpejta.

Blendi Fevziu: Por a vini re një diferencë mes politikës së PS dhe PD për problemin e Kosovës? Ju keni takuar edhe Zotin Berisha pardje në mbrëmje mos gaboj.

Bujar Bukoshi: Po, po. Shoh që ka konsensus në Shqipëri mes forcave përsa i përket Kosovës. Se sa mundet të na ndihmojë Shqipëria, kjo është temë tjetër.

Blendi Fevziu: Cilat kanë qenë marrëdhëniet tuaja me Zotin Berisha, Zoti Bukoshi?

Bujar Bukoshi: Kanë qenë dhe janë të shkëlqyera.

Blendi Fevziu: Ka patur disa komente jo direkt nga shtypi, por në ambientet e gazetarisë sipas të cilave disa nga njerëzit tuaj, të forcave të armatosura të Kosovës kanë marë pjesë në veprimet e armatosura të 14 Shtatorit në Tiranë. Besoj ju jeni në dijeni të këtyre komenteve?

Bujar Bukoshi: Në dijeni të këtyre komenteve jam, por ne nuk e kemi konsideruar të nevojshme të meremi me këtë sepse këto nuk qëndrojnë. Do ishte e dëmshme të merremi me këtë, nuk ka asgjë të vërtetë.

Blendi Fevziu: Nëse do të ketë një intensifikim të veprimeve luftarake a mendoni se do të ketë një fluks të ri emigrantësh nga Kosova drejt Shqipërisë?

Bujar Bukoshi: Po, duhet pritur. Është si principi i një ene, e cila është nën presion nga do të marrë drejtim.

Blendi Fevziu: A keni një shifër të saktë pas rreth një viti luftimesh të humbjeve njerëzore në Kosovë?

Bujar Bukoshi: Shifër të saktë nuk ka, por mbi 2.000 njerëz janë vrarë. Janë dëme të tmerrshme materiale, një fluks i madh njerëzish ka braktisur Kosovën, është një goditje e fuqishme me pasoja për Kosovën.

Blendi Fevziu: Sot në Athinë është nënshkruar një pakt për krijimin e forcave shumëkombëshe të ruajtjes së paqes për Europën Juglindore, a keni shpresë se mund të luaj një rol në Kosovë.

Bujar Bukoshi: Mund ta përshëndesim këtë, por për zgjedhjen e problemit të Kosovës është një forcë që quhet NATO dhe ajo mund t’i kryej punët.

Blendi Fevziu: Ju shpresoni në një ndërhyrje të NATO-s? Disa herë janë bërë paralajmërime, por kanë mbetur thjeshtë paralajmërime.

Bujar Bukoshi: Nuk shpresoj, por pas zhvillimeve të fundit në Kosovë mendoj se është koha të rishqyrtohet veprimi i NATO në Kosovë, sepse modelet tjera nuk janë efektive.

Blendi Fevziu: A ndiheni të braktisur nga komuniteti ndërkombëtar Zoti Bukoshi?

Bujar Bukoshi: Unë personalisht jo, por mbretëron kjo ndjenjë se jemi të braktisur. Nuk jemi të braktisur, por duhet të punojmë shumë që ne të fuqizohemi.

Blendi Fevziu: A mendoni se Këshilli i Sigurimit mund t’i japë një mandat këshillit të forcave të NATO-s për ndërhyrje në Kosovë?

Bujar Bukoshi: Nuk ka nevojë për ndonjë mandat ekstra.

Blendi Fevziu: Sekretari Amerikan i Shtetit e ka shprehur këtë, që mund të ndërhyjnë dhe pa mandat, por sidoqoftë një mandat politik do të ishte një fitore shumë e madhe për ju.

Bujar Bukoshi: Do të ishte patjetër, por ju e dini sa e koklavitur është të arrihet një gjë e tillë në Këshillin e Sigurimit, aq më tepër që situata po acarohet dhe po çojnë kokë qëndrime të tjera të disa aleatëve ose nostalgjikëve të Serbisë.

Blendi Fevziu: E keni fjalën për Rusinë këtu Zoti Bukoshi?

Bujar Bukoshi: Unë thashë aleatë që kanë sentimente të vjetra, nuk është vetëm një aleat. Serbia ka patur dhe ka aleatë të fuqishëm.

Blendi Fevziu: Këtu fusni edhe SHBA-në?

Bujar Bukoshi: Jo, SHBA nuk është aleat i këtij apo atij. Është superfuqi dhe nuk ka nevojë për aleanca, por thjeshtë mund ta imponojnë atë si superfuqi e vetme që ka mbetur.

Blendi Fevziu: Një nga zhvillimet më të fundit në Kosovë është kapja e 8 ushtarëve të forcave jugosllave nga forcat e UÇK. Kjo ka ngjallur mjaft reagime në politikën botërore, a mendoni se kjo mund të krijojë probleme në zhvillimet e ardhshme politike?

Bujar Bukoshi: Jo vetëm ky fenomen, por do të dalin edhe fenomene të tjera të ndryshme. Ne jemi të interesuar që të mos ketë asgjë nga kjo, mos krisë asnjë fishek në Kosovë.

Blendi Fevziu: A mund të ketë premisa që me këtë UÇK të quhet terroriste?

Bujar Bukoshi: Nëse UÇK do të shpallej terroriste kjo do të thoshte se Kosova i ka disa qindra e mijëra terroristë me një trend që të bëhen 1 milionë. Këto janë tentativa të regjimit serb.

Blendi Fevziu: Dje Zoti Maloku është vrarë në Prishtinë, a keni dijeni për këtë vrasje?

Bujar Bukoshi: Tre apo katër persona të maskuar kanë gjuajtur para banesës së tij.

Blendi Fevziu: Është rasti i dytë, sepse është tentuar të vritet edhe Sabri Hamiti, një nga njerëzit e afërt të Rrugovës.

Bujar Bukoshi: Kjo është shumë brengosëse. Serbia nuk përdor vetëm granata, polici e ushtri, por është e specializuar dhe mund t’i përdorë situatat për të thënë që shqiptarët vriten me njëri-tjetrin. Ka patur edhe në të kaluarën nga këto dhe ne duhet t’i kemi parasysh.

Blendi Fevziu: Pyetja e fundit ka të bëjë me ndihmën e Shqipërisë. Deri sot keni patur mbështetje morale dhe politike nga Shqipëria, a keni patur mbështetje materiale?

Bujar Bukoshi: Kryesisht ka qenë mbështetje politike, solidarizim dhe mbështetje morale, por edhe shfrytëzimi i Shqipërisë si bazë logjistike për ndihma humanitare nga jashtë. Mendoj se duhet të jemi të kënaqur me mbështetje politike dhe nuk do të presim për mbështetje financiare.

Blendi Fevziu: Po për bazë ushtarake?

Bujar Bukoshi: Jo, Shqipëria nuk është involvuar në aspektet ushtarake, vetem në mbështetje politike.

Blendi Fevziu: Nëse situata do të agravohet, a prisni mbështetje ushtarake.

Bujar Bukoshi: Nëse situata komplikohet dhe Serbia të lëndojë ma mer mendja se duhet të reagohet ndryshe. Ma mer mendja se Shqipëria duhet të reagojë, është punë e shtetit shqiptar se si.

Blendi Fevziu: Po bashkohem edhe unë me të gjithë shqiptarët që përshëndesin këtë nismë për një takim të mundshëm të të gjitha forcave politike shqiptare dhe për një unifikim të qëndrimit politik të shqiptarëve të Kosovës. Ju falenderoj për intervistën dhe uroj që gjithçka të shkojë mirë sot dhe në të ardhmen.

Bujar Bukoshi: Faleminderit.

*Ky material është pjesë përbërëse e arkivës së Televizionit Klan për periudhën 1998-2012 që do të publikohet në kanalin e ri në YouTube, RTV Klan Arkiv