Këngëtarja me origjinë shqiptare, Dua Lipa së fundmi përmes telefonit ka dhënë një intervistë për BBC. Në lidhje me vetëizolimin si pasojë e pandemisë, Dua u shpreh se është duke e shijuar sepse është duke bërë gjëra që normalisht nuk ka mundësi për t’i bërë.

“Unë jam duke bërë gjëra që normalisht nuk kam mundësinë për të bërë, kam pushuar, kam lexuar dhe kam parë shfaqje në TV”.

Por pavarësisht kësaj, planet e Dua Lipës për këtë muaj ishin shumë të ndryshme, duke përfshirë publikimin e albumit dhe turneun botëror.

Ndërsa artistë të tjerë si, Lady Gaga, Sam Smith vendosën të shtynin datën e publikimit të albumit të tyre për shkak të situatës, Dua zgjodhi ta publikonte, duke ia dhënë fansave një javë më herët sesa ishte planifikuar.

“Unë bëra këtë album për t’ju larguar nga çdo presion, ankthe dhe mendim nga bota e jashtme. Ai u bë për t’u dëgjuar në klube dhe festivale, por në të njëjtën kohë, unë dëshiroja t’u jepja njerëzve lumturi gjatë kësaj kohe, ku ata nuk duhet të mendojnë për atë që po ndodh dhe thjesht të qetësohen dhe të vallëzojnë”.

“Future Nostalgia” aktualisht po renditet në numrin një në Mbretërinë e Bashkuar dhe në pesë këngët e para në SHBA. Gjithashtu është konsideruar si një nga albumet më të vlerësuara deri tani të vitit 2020.

Në lidhje me këngët e këtij albumi, këngëtarja shprehet se ato përcjellin përvojat e saj personale.

“Unë isha shumë e frymëzuar dhe e dija saktësisht se çfarë do të bëja. Këto këngë që unë kam shkruar, unë isha në ato sezone dhe ato janë përvojat e mia personale. Kur këndoni ato këngë, dëshironi të ndjeheni më të fuqishëm”.

Dua gjithashtu ka folur për të drejtat e abortit, kritikoi trajtimin e grave në Arabinë Saudite dhe paraqiti një plan prej pesë pikash, që industria e muzikës të zhvillohej në Unionin e Kembrixhit.

Gjatë intervistës, Dua u ndal edhe tek fillimet e saj në muzikë. Dua ka lindur në Londër, por në moshën 13-vjeçare prindërit e saj e morën përsëri në Prishtinë. Ajo qëndroi aty vetëm dy vjet, dhe më pas shkoi në Mbretërinë e Bashkuar, vetëm për të ndjekur ëndrrën e saj për t’u bërë këngëtare.

“Unë ndjeva sikur nuk kisha mundësi të mjaftueshme, që unë të mund ta arrija këtë në Kosovë. Kështu që kur u ktheva në Londër, në moshën 15 vjeç, unë vazhdoja të shkoja në shkollë, por mendova të përdor mediat sociale në avantazhin tim dhe do të vendosja disa kopertina në internet. Thellë brenda meje kam dashur ta kem atë efektin Justin Bieber, ku dikush do të më gjente në YouTube”.

Për të fituar para për seanca muzikore, ajo punoi në restorante dhe klube të natës dhe në moshën 18-vjeçare arriti të realizonte një kontratë regjistrimi. Albumi i saj debutues u vonua tre herë, por deri në muajin Shkurt të vitit 2017, ajo pati tre këngë të renditura në 15 këngët më të mira.  

Atë verë, “New Rules” e çuan karrierën e saj në një tjetër nivel. Ajo shprehet se përvoja, e ndihmoi atë më pas të përcaktonte se kush dëshironte të ishte si artiste.

“Ndjehem sikur jam shumë më tepër në kontakt me atë që jam tani. Unë kam një ide shumë të qartë për atë që po bëj dhe atë që dua të them”.

Ndryshimi ishte i dukshëm kur Dua performoi këngën “Don’t Start Now”, në MTV Europe Music Awards, Nëntorin e kaluar. Fansat filluan të mbeteshin të habitur nga lëvizjet dhe vallëzimi i saj në skenë.

“Ishte hera e parë që dola në skenë dhe u ndjeva vërtet krenare”, shprehet Dua.

Që nga ai moment, vëmendja e Dua Lipës u përqëndrua tek albumi i saj i dytë, por virusi erdhi dhe planet e këngëtares duhet të ndryshonin.

“Oh, unë u mërzita vërtet. Qëllimi im për këtë album ishte që të krijoja këngë që do jetonin për një kohë të gjatë. Kështu që unë shpresoj vërtet që pasi situata të përfundojë, unë të jem në gjendje të organizoj festivale, koncerte dhe të mund të performoj ato këngë”. /tvklan.al