Jordania ndaloi raportimin për një komplot të dyshuar për destabilizmin e këtij vendi, i cili thuhet se përfshin edhe ish-princin e kurorës, Hamzah bin Hussein.
Prokurori i Përgjithshëm tha se ndalesa vlen edhe për mediat sociale.
“Për të ruajtur sekretin e hetimeve që po ndërmerren nga shërbimet e sigurisë, në lidhje me lartmadhërinë e tij, princin Hamza bin Hussein, dhe të tjerët, prokurori publik i Amanit ka vendosur të ndalojë publikimin e gjithçkaje në lidhje me hetimet në këtë fazë”, tha përmes një deklarate Zyra e prokurorit të përgjithshëm.
Në fundjavë, qeveria jordaneze e akuzoi princin Hamzah 41 vjeç, për komplot kundër Mbretërisë.
Zëvendëskryeministri Ayman Safadi tha se Hamzah punoi me “palë të huaja” për të destabilizuar shtetin.
Gjashtëmbëdhjetë persona, përfshirë një ish-këshilltar të mbretit të Jordanisë, Abdullah, dhe një anëtar tjetër të familjes mbretërore, u arrestuan, nën akuzat për kërcënim të sigurisë.
Sipas njoftimeve të disa mediave, princi duket se është grindur me shefin e shtabit ushtarak për kufizimet e lirisë së tij.
Princi Hamzah i mohoi akuzat për konspiracion dhe më vonë nënshkroi një letër për të konfirmuar besnikërinë e tij ndaj mbretit Abdullah.
“Unë e vendos veten në duart e madhështisë së mbretit. Do të mbetem i përkushtuar ndaj Kushtetutës së Mbretërisë së Jordanisë”, thuhet në letër.
Letra erdhi pas ndërmjetësimit të xhaxhait të princit, për të ndihmuar në zgjidhjen e mosmarrëveshjeve.
Përçarja publike midis princit Hamzah dhe mbretit Abdullah është e pashembullt. /REL
