E vendosur në bregdetin mahnitës jugor të Shqipërisë, Saranda shkëlqen si një diamant në detin Jon. Me mbi 270 ditë me diell në vit dhe ujëra të kristalta që rivalizojnë Karaibet. Kështu i shkruhet në artikullin e revistës franceze “Journée Mondiale” për qytetin bregdetar në jug të vendit.
Plazhet kryesore të Sarandës janë mahnitëse, magjia e vërtetë qëndron në thesaret e saj më pak të njohura bregdetare. Plazhi Pulëbardha ofron rërë të bardhë dhe ujëra bruz. Turistët aventurierë mund të eksplorojnë plazhet e fshehura që kërkojnë ecje të shkurtra, por që ofrojnë qetësi.
Të apasionuarit pas historisë do ta gjejnë veten të magjepsur nga Kalaja e Lëkurësit, një kështjellë e shekullit XVI me pamje mahnitëse mbi bregdet. Vetëm 18 kilometra në jug shtrihet Parku Kombëtar i Butrintit, një vend i Trashëgimisë Botërore të UNESCO-s me një histori 3000-vjeçare.
Këto rrënoja të ruajtura në mënyrë të jashtëzakonshme shfaqin ndikimet greke, romake, bizantine dhe veneciane. Më tej në artikull shkruhet se në brendësi të Sarandës ndodhet një nga mrekullitë natyrore e Shqipërisë, Syri i Kaltër. Ky burim natyror hipnotik ka ujëra blu intensiv . Uji ruan një temperaturë të 10°C gjatë gjithë vitit, duke ofruar freski gjatë eksplorimeve të verës.
Një rëndësi të veçantë artikulli i kushton edhe kulinarisë, ku ushqimet e freskëta të detit dominojnë menutë, me ushqimet e ditës të pjekura në skarë apo thjesht me vaj ulliri dhe limon.
Mos humbisni gatimet tradicionale si tava e kosit dhe byreku, i mbushur me djathë ose spinaq. Vendndodhja strategjike e Sarandës e bën atë ideale për eksplorim. Tragetet e rregullta lidhen me ishullin grek të Korfuzit në vetëm 30 minuta. Ndërkohë, Riviera Shqiptare shtrihet drejt veriut me rrugë bregdetare që të kujtojnë bregdetin e Amalfit të Italisë.
Për ata që kërkojnë qëndrime më të gjata, Shqipëria ofron kushte të favorshme për viza nomade digjitale në krahasim me destinacionet e tjera evropiane.
Klan News
