Nuk ka konsensus mes Ligës dhe qeverisë
Pas një mbledhjeje që zgjati thuajse 3 orë, mes klubeve të ligës së futbollit dhe të deleguarit të qeverisë Fidel Ylli, palët mbetën sërish në të njëjtat llogore. Deputeti socialist Ylli ritheksoi edhe një herë se nuk mund të negociohet me qeverinë në kushte bojkoti, por dha sinjale se qeveria është e gatshme të ulet në negociata.
“Qeveria që ditën e parë ka qenë e gatshme, që ne gjatë kësaj jave që bojkotuam, po të ishim ulur do të kishim marrë një zgjidhje. Ne do të ecim shumë shpejt, që këto kërkesa t’i vemë në zbatim. Por në rast se ata do të fillojnë kampionatin, atmosfera dhe kryeministri do të jetë shumë herë më i gatshëm të gjejë dhe një hapësirë që të presë grupin e punës, negociatorin e tij, për t’i dhënë zgjidhje të gjithë këtyre problemeve”.
Nga ana tjetër klubet do të hartojnë një dokument me komente për ndryshimet në ligj se si mund të plotësohen kërkesat e tyre, ndërkohë që nuk heqin dorë nga bojkotimi i sezonit të ri futbollistik.
“Ramë dakord për të dërguar të gjithë komentet mbi katër kërkesat që kemi bërë. Përshëndesim deklaratën e zotit Ylli që qeveria është e gatshme për të realizuar kërkesat dhe që është në sinkron me ne. Ne do të vazhdojmë me procedurat, do të shohim në dinamikë situatën si do shkojë. Situata nuk pritet me thikë sot, po e ndjekim gjithë pasditen. Bojkoti? Sigurisht që vazhdon”.
Kampionati duhet të niste më 12 Shtator, por klubet janë të vendosur të mos luajnë nëse nuk plotësohen kërkesat e tyre.
Tv Klan
