Drafti do të diskutohet nga Komisioni i Ligjeve
Një ditë pas mbarimit të afatit të Komisionit të Reformës Zgjedhore, në Parlament u depozitua dokumenti final me amendimet e bëra në Kodin Elektoral nga Këshilli Politik.
Ndryshimet kanë ardhur si propozim i një grupi deputetësh dhe do të diskutohen në Komisionin e Ligjeve dhe jo në Komisionin e Posaçëm të Reformës Zgjedhore të cilit i ka mbaruar afati.
Në draftin final janë përfshirë të gjitha çështjet e dakordësuara në marrëveshjen e 5 Qershorit, duke reflektuar propozimet e opozitës, si dhe rekomandimet e OSBE/ODIHR-it.
Po çfarë risish sjell dokumenti i ri, për dakordësinë e të cilit u desh ndërhyrja e drejtpërdrejtë e diplomatëve të huaj në Tiranë, negociata të cilat u udhëhoqën nga ambasadorja e Shteteve të Bashkuara Yuri Kim?
Në draftin e ri palët kanë rënë dakord që të ndryshojë periudha zgjedhore, për ta shtrirë atë nga 15 Prilli deri në 15 Maj, ose nga 15 Tetori deri në 15 Nëntor.
Përdorimi i teknologjisë në zgjedhje, e më konkretisht identifikimi biometrik është një tjetër risi, duke ia besuar monitorimin, implementimin, rekrutimin si dhe trajnimin e zyrtarëve zgjedhorë nënkomisionerit, që do të jetë propozim i opozitës.
Ndërsa organi që të do të mbikëqyrë të gjithë procesin elektoral do të ketë nga këto zgjedhje parlamentare një përbërje të re, duke e ndarë atë në tre nivele; Komisioneri Shtetëror, Komisioni Rregullator dhe ai i Ankimimeve e Sanksioneve.
Krimet elektorale do të hetohen nga Struktura e Posaçme Antikorrupsion, ndërsa një rol më aktiv i është besuar policisë në qendrat e votimit, të cilat do të pajisen edhe me kamera sigurie.
Palët politike në Këshill kanë rënë dakort për të vijuar edhe fazën e dytë të reformimit të legjislacionit zgjedhor mes të cilave ligjin e ri “Për partitë politike dhe financimin e partive politike”.
Por pavarësisht dakordësisë së arritur në këshill, për miratimin e Kodit Elektoral në Kuvend nevojiten 84 vota dhe sfida e radhës për mazhorancën është të bindë opozitën parlamentare e cila e ka kushtëzuar atë me ndryshimin e sistemit, listave të hapura, heqjen e koalicioneve elektorale, si dhe pragun elektoral 5%.
Tv Klan
