Kosova ka marrë statusin e anëtarit të asociuar në Asamblenë Parlamentare të NATO-s të hënën. Shumica e vendeve kanë votuar pro, një votë ka qenë kundër dhe 14 vende tjera kanë abstenuar, në takimin e Asamblesë që u mbajt në Sofje të Bullgarisë.

Kosovën e kanë përfaqësuar deputetët Driton Hyseni dhe Xhavit Haliti. Serbia kishte bërë përpjekje maksimale që Kosova të dështoj në këtë avancim.

Presidentja Vjosa Osmani është shprehur e lumtur me vendimin që morri Asambleja Parlamentare e NATO-s duke thënë se fati i Kosovës është NATO.

“Do të vazhdojmë përpjekjet tona së bashku me aleatët tanë për të çuar përpara edhe rrugën tonë drejt anëtarësimit në NATO”, tha Osmani.

Ministri i Mbrojtjes, Ejup Maqedonci, ka shkruar se nga tani Kosova do të ketë të drejtë propozimi e komentimi të çdo procesi apo dokumenti që trajtohet nga Asambleja e NATO-s.

Me këtë vendim Kosova është vetëm një hap larg anëtarësimit me të drejta të plota në Asamblenë Parlamentare të NATO-s, gjë që sigurisht se do të ndikojë në stabilitetin e Ballkanit.

Vendimin e kanë mirëpritur edhe partitë politike opozitare duke thënë se Kosova e ka vendin në NATO. Kuvendi i Kosovës, prej vitesh, është delegacion vëzhgues me dy ulëse. Tani, me avancimin e statusit do të mund të zgjerohet edhe delegacioni pjesëmarrës kosovar.