Një takim tjetër kryeministri Albin Kurti ka zhvilluar me të dërguarin e BE-së për dialogun Miroslav Lajçak të mërkurën mbrëma. Ndonëse Lajçak në një njoftim në Twitter ka thënë se janë pajtuar që të gjitha marrëveshjet e kaluara të dialogut, të zbatohen plotësisht, kryeministri Albin Kurti ka thënë se ndërmjetësuesit ndërkombëtarë vijnë me kërkesa të Serbisë e të cilat sipas tij, janë irracionale.
“Ky propozim i ka 5 fjali në preambulë dhe 10 nene gjithsej. Kur e patëm marrë ne atë më datën 9 shtator, patëm thënë që është bazë e mirë për diskutimet e mëtutjeshme, është një kornizë e platformë dhe e cila na mundëson që të ecim përpara, mirëpo nevojitet një proces negociator i bisedimeve, në mënyrë që ai propozim të bëhet marrëveshje. Ajo se çfarë ne theksojmë është që në njërën anë janë 33 marrëveshje të Brukselit nga dekada e kaluar dhe nuk ka asnjë marrëveshje e cila ka prioritet ndaj një marrëveshjeje tjetër”.
Ai insiston se nuk do të tolerojë që në procesin e bisedimeve me Serbinë, asociacioni i komunave më shumicë serbe të vihet si parakusht. Lajçak në një intervistë në Rubikon në Klan Kosova ka thënë që ky propozim adreson shumicën e çështjeve, por do të mbeten edhe disa të tjera e ai do të ishte fundi i tregimit. Ka pohuar se filozofia e propozimit të dokumentit 11 pikësh nuk ka për të ndryshuar. Ai renditi mes tjerash edhe disa nga përfitimet që do ketë Kosova nga kjo marrëveshje.
Tv Klan
