Kryeministri i Kosovës, Albin Kurti, është shprehur i gatshëm për zgjedhje të parakohshme. I ka bërë thirrje opozitës të bëhet gati në të kundërtën ai mund të qëndrojë në qeveri deri në fund të mandatit.
“Opozita duhet të bëhet gati, ne jemi gjithmonë gati, përndryshe nëse ata janë rehat shkon mandati”, tha Kurti.
Kurti foli edhe për takimin me kreun e PDK-së Memli Krasniqi ku diskutuan edhe për zgjedhjet.
“Për mua ka qenë shumë e rëndësishme të diskutohet agjenda legjislative, pasi kanë mbetur shumë marrëveshje ndërkombëtare pa u votuar”, tha ai.
Kurti pas takimit me Krasniqin kishte thënë se të gjitha partitë duhet të dakordohen për datën e zgjedhjeve.
Teksa PDK-ja është shprehur pro shpërndarjes së Kuvendit, LDK e AAK po kërkojnë dorëheqjen ose shkarkimin e Kurtit.
E dorëheqjen e Kurtit e ka kërkuar edhe ish-kryenegociatorja Edita Tahiri pasi që Kosova përfundimisht nuk u fut në axhendë për t’u bërë anëtare e Këshillit të Evropës.
Tv Klan