Sandër Lleshi është Ministri i ri i Brendshëm. Ai vjen në këtë detyrë me propozim të Kryeministrit Edi Rama, pas dorëheqjes së Fatmir Xhafajt.

Kreu i qeverisë, në postimin e tij në rrjetet sociale shprehej besimplotë se

“

Gjeneral Sandër Lleshi

do të sjellë një energji të re pozitive në krye të Punëve të Brendshme”.

Por kush është Sandër Lleshi, ushtaraku që mbante aktualisht postin e Këshilltarit për Sigurinë Kombëtare. Ai nuk është një emër i panjohur dhe kjo nuk është hera e parë që Kryeministri Edi Rama shpreh vlerësim për figurën e tij.

Në 2013-ën Rama e zgjodhi Sandër Lleshin këshilltarin e tij për mbrojtjen. Në atë kohë kreu i qeverisë shpjegoi se ndikim për zgjedhjen e tij e kishte pasur edhe nga shkrimtari Ismail Kadare.

“

Emrin e Sandër Lleshit e kam dërguar për herë të parë nga Ismail Kadare, i cili ia sugjeroi palëve si një kandidaturë të spikatur për President të Republikës një vit më parë”,

shkruante Kryeministri Edi Rama, në një postim në rrjetet sociale në atë kohë.

Me një karrierë të lartë në ushtrinë shqiptare, në 2010-n Sandër Lleshi u emërua në postin e zv.shefit të Shtabit të Përgjithshëm të Forcave të Armatosura të Shqipërisë.

Në periudhën 1996-2000, gjeneral Lleshi ka qenë komandant i Kurseve në Akademinë e Mbrojtjes në Tiranë dhe më pas, për tre vjet të tjera, ishte komandant i Akademisë Ushtarake “Skënderbej”.

Në vitet 2003-2006 ka shërbyer si atashe i Mbrojtjes i Republikës së Shqipërisë në Gjermani. Sa i takon arsimit të tij në fushën ushtarake, ai fillon në periudhën 1978-1985 kur ka kryer shkollën e Mesme Ushtarake “Skënderbej” dhe Akademinë Ushtarake.

Nga viti 1994 deri në 1999 ka kryer një sërë kursesh, si ai i gjuhës gjermane në Akademinë e Mbrojtjes Kombëtare në Vjenë (Austri); kurs i avancuar i gjuhës gjermane në Institutin Federal të Gjuhëve (Bundessprachenamt) në Gjermani; kurs i komandantit të Batalionit në Shkollën e Artilerisë Kundërajrore në Rendsburg, Gjermani; kurs i Shtabit të Përgjithshëm në Akademinë e Drejtimit në Hamburg, Gjermani dhe kurs i Sigurisë Europiane në Akademinë e Drejtimit në Hamburg, Gjermani.

Në 2008-n, gjeneral Lleshi ka përfunduar Seminarin e Lartë Ekzekutiv në Qendrën për Studime të Sigurisë Europiane, George C. Marshall në Garmisch-Partenkirchen, Gjermani; Ndërsa në 2011-ën përfundoi Kursin e Lartë Ndërkombëtar për Menaxhimin e Mbrojtjes në Shkollën Pasuniversitare të Marinës në Monterey, Kalifornia, SHBA.

/tvklan.al