Ilir Kupës i mbetet në fuqi dënimi me 25 vjet burg, për arratisjen nga burgu grek

Gjykata Kushtetuese ka rrëzuar kërkesën e Ilir Kupës i njohur edhe si anëtar i “Bandës së Babagjyshëve”.

Kupa është shpallur fajtor për disa grabitje me dhunë e me armë në Greqi, arratisjen nga burgu i Trikalës dhe plagosjen e punonjësve të burgut në vendin fqinj.

Kushtetuesja nuk e ka marrë parasysh kërkesën e Kupës, i cili kundërshtonte vendimin e Gjykatës së Lartë që la në fuqi dënimin me 25 vite burg, për krimet e kryera në Greqi. 

Antari i “Bandës së Babagjyshëve” pretendon se Gjykata e Lartë ka shkelur ligjin pasi vendimi është marrë në dhomë këshillimi pa i dhënë atij të drejtën për t’u dëgjuar.

Ky fakt nuk është cilësuar shkelje ligjore nga Kushtetuesja, e cila ka vendosur që kërkesa e tij të mos kalojë në seancë plenare. 

Ilir Kupa u arratis në datën 22 Mars 2013 nga burgu Trikallas, Greqi, ku ai po vuante dënimin. Ai u arrestua në vendin tonë në 2015 dhe kërkoi të mos ekstradohej në Greqi pasi i rrezikohej jeta. Në atë kohë ai u arratis së bashku me 10 shqiptarë të tjerë. 

Gjykata e Shkallës së Parë për Krime të Rënda e dënoi me 25 vite burg. Ndërsa Apeli për krime të rënda e uli dënimin ne 16 vite e 8 muaj.

Nga ana e saj Gjykata e Lartë prishi vendimin e Apelit dhe la në fuqi dënimin me 25 vite burg.

Klan News