Partia Demokratike ka reaguar pas lirimit nga qelia të Rexhep Rrajës, djalit të deputetit socialist Rrahman Rraja. Përmes një deklarate dërguar mediave, Partia Demokratike thotë se lirimi i tij është provë e rënies së sistemit të drejtësisë.
Gjykata e Krujës dënoi me 1 vit shërbim prove Rexhep Rrajën, i akuzuar për përndjekjen e ish të dashurës së tij Xhisiela Maloku.
Reagimi i Partisë Demokratike:
Vendimi për lirimin e përdhunuesit Rexhep Rraja është një tjetër provë e rënies së sistemit të drejtësisë.
I biri i deputetit mafioz të Fushë Krujës është lënë i lirë jo për t’i shërbyer komunitetit, por për t’i shërbyer pushtetit kriminal të Edi Ramës.
Lirimi nga burgu i djalit përdhunues të deputetit socialist tregon standardin e dyfishtë të drejtësisë që kontrollon Edi Rama. Nga njëra anë, mbahen në burg qytetarët që nuk paguajnë dot dritat, nga ana tjetër, lihen të lirë ata që vjedhin votat për Edi Ramën, përdhunuesit, vrasësit dhe trafikantët e drogës.
Edi Rama nuk ka ndërmend të ndërtojë një drejtësi më të mirë për shqiptarët, por një drejtësi që i shërben atij, ministrave të tij të korruptuar dhe krimit të organizuar me të cilin vjedh votat dhe bashkëqeveris.
/tvklan.al
