Rama: Presidenti Meta është i frikësuar nga Reforma në Drejtësi
Takimi i duarve mes dy liderëve të partive opozitare, për kryeministrin Edi Rama fsheh një skenar të mirëmenduar.
“Është pjesë e planit për të lidhur Lulin me zinxhirin e Monikës, për llogari të Ilirit dhe Saliu dhe pastaj ose për të marrë pushtetin dhe për të shpërbërë Reformën në Drejtësi ose kokën e Lulit, thotë ai.
Për kreun e qeverisë, përgjegjës nuk është Monika Kryemadhi me presidentin Meta por vetë Lulzim Basha, të cilit nuk ia kurseu kritikat, aspak dashamirëse.
“Lulzim Basha që nuk ka këllqe, që nuk ka karakterin e një lideri që të mos fshihet as kur i tregojnë se çfarë do t’i bëjnë të nesërmen, është lider por i një shoqërie aksionere me 2 ortakë, Ilir Metën dhe Sali Berishën dhe me një notere e përmbaruese, Monika”, tha Rama.
Në konferencën e gjatë me gazetarët, kreu i qeverisë foli dhe për nivelin e besueshmërisë së Reformës në Drejtësi, që sipas tij e tregon më së miri tensioni i Ilir Metës.
“Reforma në Drejtësi është aq e besueshme sa niveli i shkallimit të Ilir Metës, shikoni Ilir Metën dhe aty matet besueshmëria e reformës, janë mjaftueshmërisht të qarta për të tensionuar Ilir Metën dhe Sali Berishën”, u shpreh Rama.
Thirrjet e vazhdueshme të ndërkombëtarëve për kandidatë të pastër në lista duket se e kanë lodhur kryeministrin Rama.
“Janë bërë si këngë të padurueshme, procesi eshtë i garantuar”, tha ai.
Kjo konferencë online me gazetarët u paralajmërua si e fundit nga kryeministri deri në zgjedhje.
“E nisëm me shpifje, e mbyllëm me shpifje…”, tha Rama.
Klan News