Masakra në lokalin në Lushnje | Pas vrasjes së 62-vjeçarit dhe plagosjes së djalit të tij, autori telefonoi gruan




Masakra në lokalin në Lushnje | Pas vrasjes së 62-vjeçarit dhe plagosjes së djalit të tij, autori telefonoi gruan

10:47 03/06/2021

Ky është Rako Qorri, i cili u qëllua për vdekje nga bashkëfshatari i tij në Fier të Ri të Lushnjes. Shkak u bë një zënkë e çastit mes tij dhe 57-vjeçarit Sofokli Shani dhe ky i fundit e qëlloi me kallashnikov. Mësohet se ata janë konfliktuar edhe fizikisht me njëri-tjetrin, ndërsa në sherr është përfshirë edhe djali i viktimës, 31-vjeçari Klajdi Qorri.

Pas përplasjes, 57-vjeçari ka shkuar në shtëpi, ka marrë armën dhe ka qëlluar Rako Qorrin dhe të birin. 62-vjeçari mbeti i vdekur në lokalin e tij, ku ndodhi edhe ngjarja, ndërsa pak metra larg të atit u plagos edhe 31-vjeçari. Ky i fundit fillimisht mori ndihmën e parë në spitalin e Lushnjes ndërsa më pas u transportua drejt kryeqytetit, pasi gjendja e tij u përkeqësua. Një nga dëshmitaret e ngjarjes tregon për Klan News atë se çfarë pa kur mbërriti tek lokali.

“Kur erdhëm ne ishte vetëm roja. Në ngjarje kishin qenë disa djem, por i kishin larguar më duket…”

Pas ngjarjes policia e vuri në pranga 57-vjeçarin Sofokli Shani. Klan News ka mësuar se pasi kreu krimin, ai ka telefonuar bashkëshorten duke i thënë se e kishte vrarë 62-vjeçarin dhe ka qenë duke pritur policinë që ta arrestonte. Dyshohet se 57-vjeçari ka qenë në gjendje të dehur kur ka kryer vrasjen. Shani ka qenë edhe më parë i dënuar pasi ka vrarë para viteve ’90 me thikë shokun e tij dhe ka qenë i dënuar me 15 vite burg.

Klan News





Të ngjashme