Lindja e bebeve me sindromën Down ka ardhur në rënie nga viti në vit.
Sipas një raporti të hartuar nga Instituti i Shëndetit Publik, në vitin 2011, për çdo 730 bebe të lindura një ishte i prekur nga sindromi Down apo siç njihet ndryshe trizomia 21.
Në vitin 2018 ky raport ishte 1 bebe për 1800 lindje.
Ekspertët janë të mendimit se rënia e lindjeve me këtë anomali kromozomike ka ardhur si pasojë e parandalimit me anë të analizave perinatale.
Në vendin tonë janë gjithsej 643 persona me sindromën Down.
Analiza e ADN dhe një seri analizash për zbulimin e diagnozave para-lindjes, tashmë do të ofrohen falas në strukturat publike.
Ministria e shëndetësisë ka investuar në laboratorin e gjenetikes pranë maternitetit Mbretëresha Geraldinë, duke ju dhënë kështu mundësinë të gjitha femrave të kryejnë analizat molekulare të fetusit që në javët para të shtatzanisë.
Në rang botëror prania e sindromës Down është vlerësuar 5 fëmijë për 10 000 lindje dhe haset tek të gjitha popullatat.
Fëmijët me sindromën Down kanë një kopje shtesë të një prej kromozomeve, kromozomi 21. Kjo kopje ekstra ndryshon zhvillimin e trupit dhe trurit të foshnjës, që mund të shkaktojë sfida mendore dhe fizike për fëmijën.
Tv Klan
