Nano: Një tjetër vepër i shtohet kujtesës kombëtare
Në kujtim të 225 efektivëve të policisë të rënë në krye të detyrës, sot më 5 maj në kuadër të ditës së dëshmorëve të atdheut, në Akademinë e Sigurisë është përuruar Memoriali i Dëshmorëve të Policisë.
Në ceremoninë e mbajtur, drejtori i përgjithshëm i policisë së shtetit, Gledis Nano tha se me këtë memorial vendit i shtohet një tjetër vepër e kujtesës kombëtare.
I pranishëm në ceremoninë e zhvilluar, kryetari i bashkisë së Tiranës, Erion Veliaj tha se institucioni që ai drejton ka dhënë kontribut për ndërtimin e kësaj vepre. Ndërsa shprehu mirënjohjen e thellë ndaj efektivëve të rënë në krye të detyrës.
Për të shprehur mirënjohjen ndaj të rënëve në detyre, ministri brendshëm Bledi Çuçi tha se familjarëve të dëshmorëve i është mundësuar mbështetje financiare.
Po gjatë ditës së sotme u shpallën dëshmorë 3 efektivë të rënë në detyrë. Elham Elezaj, ish-komandant i Reneas i vrarë në korrik të 98’ës, Rufan Hakrama dhe Artan Cuku, ish-drejtuesi i policisë i vrarë në 2017-ën nga sot do të prehen në Varrezat e Dëshmorëve./ Tv Klan
