Mësuesja italiane i thotë që shqiptarët nuk çajnë, studentja shqiptare hap markën e saj dhe i dhuron parfum



Mësuesja italiane i thotë që shqiptarët nuk çajnë, studentja shqiptare hap markën e saj dhe i dhuron parfum

14:15 16/04/2021

Të ftuar në emisionin “Historia ime” në Tv Klan ka qenë një çift mjaft simpatik të cilët e kanë krijuar jetën e tyre në Itali, Jola dhe Nertili. Ata kanë hapur një markë të tyre në Itali me parfume të cilëve i kanë vendosur emrin “Shqipëria ime” dhe aksesorë luksi si rripa, portofolë, këpucë etj. Kjo markë është bërë ndërkombëtare e cila është futur edhe në tregun e Gjermanisë, Zvicrës, Italisë, Amerikës etj.

Ata jetojnë prej shumë vitesh në Firence të Italisë, ku Jola ka përfunduar studimet për Dizajn ndërsa Nertili për Inxhinieri Elektronike. Për të dy pasioni ka qenë moda derisa me shumë përpjekje dhe mundime ata finalizuan markën e tyre të suksesshme ndërkombëtare.

Jola tregon se është përballur me racizmin çdo ditë kur shkonte në shkollë sepse ata e konsideronin si vendin e tyre dhe ajo ishte e huaj. Indiferentizmi në Itali është i madh për emigrantët dhe i trajtojnë si njerëz që nuk janë të aftë për asnjë gjë dhe duhet t’i vihen në shërbim të tyre. Në fillim këtë gjë e kanë ndjerë shumë, por pasi hapën markën e tyre, ata nuk kanë ndjerë më racizëm apo indiferentizëm nga italianët.

Jola: Unë kam qenë shumë e emocionuar, do jepja një provim dhe zysha ime ma shprehu aq hapur para të gjithëve që nuk ke pse të emocionohesh kaq shumë dhe e vuan kaq shumë sepse tek e fundit nuk është se ju shqiptarët në këtë fushë do çani, do ecni dhe filloi të më citonte të gjitha gjërat që mungonin më Shqipëri. Nuk ishte vendi, nuk ishte momenti dhe brenda meje shumë emocione, unë isha rritur me edukatën që mësuesi është respekti absolut dhe i jepet respekti absolut. Kam qenë dhe pak e ndrojtur, mosha ka bërë të vetën, kështu që parfumi “Shqipëria ime” shqip ka qenë pikërisht për të treguar që edhe ne dimë dhe ne mundemi dhe nuk është e vërtetë asgjë nga ajo që konsiderohet apo ne na përçohet, përkundrazi, nëse të tjerët nuk kanë pasur mundësi, kjo nuk do të thotë që nuk e ka askush.

Mirela Milori: Reagove në ato momente apo jo?

Jola: Jo, ende e kujtoj që faqet e mia ishin skuqur shumë dhe nuk kam thënë asnjë fjalë. I kam çuar dhuratë një parfum dhe ia kam mësuar se si shqiptohej dhe ia kam shpjeguar që është shqip. Nuk reagoi thjesht më dha urimet dhe sukseset, por e di shumë mirë që e kuptoi. /tvklan.al







Të ngjashme