Një 22-vjeçar ka rënë në prangat e Policisë Shkodër, pasi akuzohet se kishte marrë një kredi në emër të një personi tjetër. Autoritetet sqarojnë se në pranga ka rënë J. D., 22 vjeç, banues ne lagjen “Salo Halili” Shkodër.

Ndalimi i tij u bë pas kallëzimit të bërë nga A. T., i cili figuron debitor pranë një banke të nivelit të dytë, fakt për të cilin nuk ka patur dijeni. Ky person ka deklaruar se nuk kishte kryer veprime në bankë dhe se kishte humbur kartën ID.

Nga veprimet hetimore ka rezultuar se për kredinë e marrë është lënë një numër kontakti, i cili pas verifikimeve të kryera dhe nga informacioni i marrë nga institucioni financiar, ka rezultuar se është në emër të shtetasit J.D.

Emri dhe numri i këtij shtetasi paraqitet si kontakt alternativ në disa raste të praktikave të kredive, konkretisht për kredi të marra nga shtetas të ndryshëm, të cilët sipas informacionit të bankës, deklarojnë se nuk kanë aspak dijeni për kryerjen e këtyre veprimeve./tvklan.al