Vetëm 1 rast i ri në Tiranë, 15 të shëruar në 24 orët e fundit

Kjo e martë shënon ditën me numrin më të ulët të të prekurve me Covid-19, që prej nisjes së pandemisë në vendin tonë. Bëhet fjalë për vetëm 1 rast të ri në Tiranë. Teksa paraqiti të dhënat e 24 orëve të fundit, Dr. Adela Vasili nga Instituti i Shëndetit Publik tha se përgjatë këtij harku kohor, numri i të shëruarve është 15.

Gjatë 24 orëve të fundit kemi të konfirmuar vetëm 1 rast pozitiv në Tiranë, nga 177 testime të kryera për të dyshuar të prekur me Covid-19. Të shëruar janë 15 qytetarë. Në spitalin Infektiv, gjendja paraqitet e qëndrueshme prej ditësh me 15 pacientë të shtruar dhe vetëm 3 prej tyre në terapi intensive. Prej më shumë se dy javësh fatmirësisht nuk kemi asnjë humbje jete. Deri më sot janë kryer rreth 13 mijë testime dhe janë konfirmuar pozitivë me Covid-19 në të gjithë vendin 949 qytetarë. Prej tyre, rreth 78% janë të shëruar”.

Në vendin tonë aktualisht janë 176 persona aktivë me Covid-19, kryesisht ne Tiranë, Durrës Krujë, Shkodër.

Edhe pse situata paraqitet e kontrolluar, vetë qytetarët duhet të tregohen të kujdesshëm, duke respektuar distancimin fizik, duke ruajtur higjienën personale, duke shmangur vizitat tek të afërmit. Qytetarët të mos neglizhojnë shenjat e sëmundjes Covid-19, por të telefonojnë në numrin unik të Urgjencës Kombëtare 127, ndërsa për çdo pyetje apo shqetësim Ministria e Shëndetësisë ka vënë në dispozicion linjën e gjelbër 0800-40-40“, u shpreh Vasili.

Ajo theksoi se në vend vazhdon shfaqja e rasteve sporadike, ndërsa situata epidemiologjike paraqitet e qëndrueshme. Marrja në kohë e masave, respektimi i distancimit fizik, ruajtja e higjienës personale, sipas Vasilit, kanë rolin kryesor në shfaqjen e një kurbe epidemike të butë./tvklan.al