Aleanca Veri-Atlantike do t’i kundërpërgjigjet në mënyrë shpejtë kërcënimeve nga jashtëm përmes një grupi të ri ushtarak.
Ky grup do të quhet “Maja e Shigjetës” dhe në përbërje të tij do të jenë 3000 deri në 5000 trupa.
Këtë e bëri të ditur Sekretari i Përgjithshëm i NATO-s Anders Fog Rasmusen gjatë një konference për shtyp, në përfundim të Samitit të 28 vendeve anëtare të aleancës, në Njuport të Uellsit.
Sipas Rasmusen, njësia e re ushatarake është një mesazh i qartë për të gjithë agresorët potencial, që kërcënojnë sigurinë e vendeve anëtare të NATOs.
Njësia do të jetë në gjendje të mobilizohet dhe të pozicionohet në rajonet e kërcënuara brenda 3 ditëve.
Marrëveshja për formimin e kësaj njësie, pjesë e një plani prej 6 pikash, erdhi në samitin që kishte në fokus, pikërisht mënyrat e menaxhimit të provokimeve ruse ndaj Ukrainës.
Në një konferencë tjetër të veçantë për shtyp, Presidenti amerikan Barak Obama foli për rritjen e buxhetit të aleancës veriatlantike, përballë kërcënimeve të vazhdueshme të kohëve të fundit.
Duke shprehur mbështetjen e plotë për qeverinë e Kievit ndaj kërcënimit rus, Obama paralajmëroi se së shpejti vendosjen e sanksioneve të reja edhe më të ashpra ndaj Moskës.
Një tjetër pikë ku u përqëndrua ky samit ishte edhe menaxhimi i situatës në Lindjen e Mesme.
Një pjesë e këtij rajoni është në kaos për shkak të aktivitetit të Shtetit Islamik.
Burime nga samiti bënë me dije se Sekretari amerikan i Shtetit Xhon Kerri kishte kërkuar ngritjen e një “aleance bërthamë” brenda NATO-s mes Shteteve të Bashkuara, Gjermanisë, Britanisë së Madhe, Francës, Italisë, Danimarkës, Polonisë, Kanadasë, Australisë e Turqisë.
Këto vende do të angazhohen në operacionet që do të ndërmerren në Lindjen e Mesme kundër Shtetit Islamik.
Tv Klan
