Ndahet nga jeta një mjek tjetër i infektuar me Covid-19



Ndahet nga jeta një mjek tjetër i infektuar me Covid-19

09:02 06/07/2020

Ministria e Shëndetësisë ka njoftuar mëngjesin e kësaj të hëne se një mjek tjetër është ndarë nga jeta për shkak të koronavirusit.

Doktor Hysni Shkjau, 69-vjeçar, nuk e fitoi dot betejën me Covid-19. Ai luftonte prej disa ditësh me sëmundjen në Spitalin Infektiv. Gjendja e tij u rëndua si pasojë e vështirësisë në frymëmarrje dhe disa sëmundjeve bashkëshoqëruese.

Shkjau, me 40 vite eksperiencë si mjek nuk e kishte ndërprerë punën dhe vijonte të shërbente si mjek familje në qendrën shëndetësore Qafë-Mali në Bashkinë Fushë-Arrëz të Pukës.

“Ministria e Shëndetësisë i shpreh ngushëllime familjarëve, miqve dhe kolegëve. Është një humbje e madhe për sistemin shëndetësor, humbja e një mjeku që i ka shërbyer me përkushtim e profesionalizëm për 40 vite komunitetit të tij”, thuhej në njoftimin e ministrisë.

Pas lajmit të trishtë për vdekjen e mjekut reagoi në rrjetet sociale ministrja e Shëndetësisë, Ogerta Manastirliu. Ajo i shprehu ngushëllime familjarëve dhe kolegëve, ndërsa thotë se është trishtuar pasi u nda nga jeta një mjek që shërbeu pa u lodhur dhe nuk u nda për asnjë ditë nga banorët e komunitetit në zonën e Qafë-Malit në Pukë.

“Ndarja nga jeta e dr. Hysniut është një dhimbje e madhe për të gjithë ne, për familjen, për kolegët, për banorët e zonës së Pukës, ku shërbeu për 40 vite me përkushtim e profesionalizëm”, shkruante ministrja.

Shkjau është personi i dytë në radhët e bluzave të bardha që humb jetën për shkak të koronavirusit. Disa ditë më parë, Arjan Pushi nuk mundi t’i mbijetonte dot sëmundjes së rëndë. /tvklan.al




Të ngjashme