Alyssa McGrath akuzon Cuomon për ngacmim seksual
Një ndihmëse e Guvernatorit të Nju Jorkut Andrew Cuomo e akuzoi atë për vëzhgimin e trupit dhe bërjen e komenteve të padëshiruara, sugjeruese e seksuale, raportoi gazeta New York Times.
Alyssa McGrath, 33 vjeç, është e fundit në listën e tetë grave që pretendojnë publikisht sjellje të pahijshme e ngacmime seksuale nga guvernatori Cuomo.
Guvernatori 63-vjeçar mohon të ketë gabuar, megjithëse ka pranuar se e ka “zakon” që të puthë dhe t’i përqafojë njerëzit kur i përshëndet. Cuomo u shpreh i keqardhur që sjellja e tij kishte vënë në siklet bashkëpunëtoret.
Shpërthimi i akuzave javët e fundit, së bashku me zbulimin se administrata vendore e Nju Jorkut raportoi vdekjet nga COVID-19 në shtëpitë e të moshuarve, nxiti thirrjet për dorëheqjen e guvernatorit, thirrje që u bënë edhe nga disa figura të shquara të demokratëve.
Prokurorja e Përgjithshme e Nju Jorkut Letitia James emëroi javën e kaluar një ekip hetuesish të jashtëm për të udhëhequr hetim e akuzave për komente të padëshiruara me sfond seksual dhe kontakte fizike të papërshtatshme, duke përfshirë puthjet e pakërkuara.
Një punonjëse e tanishme e administratës, emri i së cilës është mbajtur sekret, e akuzoi guvernatorin për kapjen e gjoksit.
Punonjësja McGrath që foli me gazetën New York Times, tha se Cuomo e pyeste për mungesën e unazës së martesës, për divorcin, madje guvernatori i kishte thënë në italisht se ishte e bukur.
Guvernatori Cuomo është zotuar të bashkëpunojë gjatë hetimit që po mbikëqyret nga prokurori i përgjithshëm i shtetit ndërsa refuzon të dorëhiqet përpara përfundimit të hetimit.
Klan News