OBSH në alarm për ritmet e përhapjes së Covid-19 në Europë



OBSH në alarm për ritmet e përhapjes së Covid-19 në Europë

16:25 15/10/2020

Kluge: 1 mijë viktima në ditë, një nga 5 shkaqet kryesore të vdekjeve

Organizata Botërore e Shëndetësisë është e alarmuar nga shpejtësia me të cilën ka nisur të përhapet koronavirusi nëpër Europë.

Shqetësimin e shprehu shefi i zyrës së OBSH-së për rajonin e Europës, Hans Kluge i cili teksa publikoi shifrat më të fundit të pandemisë për këtë rajon tha se 1 milion të infektuar i janë shtuar listës së të prekurve në 10 ditët e fundit, duke e çuar totalin e tyre në mbi 7 milionë.

Kjo sipas tij tregon se Europa ka ritmet më të larta të përhapjes së COVID-19 në botë dhe renditet e treta pas Shteteve të Bashkuara dhe Indisë.

“COVID tashmë renditet në vend të 5 në listën e sëmundjeve kryesore. Tashmë është arritur shifra e lartë prej 1 mijë vdekjesh ditore prej koronavirusit”.

Kluge përshëndeti masat që po merren nga qeveritë europiane për uljen e ritmeve të infektimeve, por u shpreh kundër zbatimit të karantinës kombëtare që sipas tij duhet të mbetet opsioni i fundit.

Shefi i OBSH-së për rajonin e Europës vlerësoi si masat më efektive, mbajtjen e maskave në ambiente të brendshme dhe të jashtme dhe kontrollin strikt të grumbullimeve sociale në ambiente publike e private.

Në këtë mënyrë sipas tij mund të ruhen jetët e deri 281 mijë njerëzve deri në Shkurt 2021 në gjithë rajonin.

Rajoni i Europës që mbulohet nga Kluge, veç kontinentit përfshin edhe Rusinë, Turqinë, Kazakistanin, etj.

Tv Klan




Të ngjashme