PD: Fituan pedagogët e studentët

PD: Fituan pedagogët e studentët

14:21 08/05/2020

Vendimin e Ministrisë së Arsimit për shtyrjen e datës së zgjedhjeve për organet drejtuese të institucioneve të arsimit të lartë, PD e cilëson si një fitore të pedagogëve dhe studentëve, me mbështetjen e opozitës.

Në një deklaratë, PD thotë se tërheqja e qeverisë nga krimi zgjedhor i mbajtjes së zgjedhjeve pa zgjedhës në arsimin e lartë është një betejë e rëndësishme e fituar nga pedagogët dhe studentët, me mbështetjen e opozitës.

“Me një proces të paligjshëm dhe absurd, Edi Rama synonte të merrte nën kontroll edhe arsimin e lartë përmes ushtarëve të tij dhe të organizatave kriminale. Rekordet e Edi Ramës me arsimin e lartë janë të njëjta me rekordet e tij për zgjedhjet. Kur nuk i fiton dot, përdor çdo mjet të pistë për pushtetin e tij. Mbajtja e zgjedhjeve në arsimin e lartë pa pedagogë dhe studentë, në kulmin e masave të jashtëzakonshme, nuk ndryshon nga akti i tij kriminal i 4 viteve më parë, kur tentoi të kapë Universitetin e Tiranës përmes Emiljano Shullazit”.

Partia Demokratike shprehet se nuk ndërhyn në zgjedhjet e Universiteteve, ndërsa sigurojnë studentët dhe pedagogët se do të vazhdojnë të jenë krah tyre.

“Partia Demokratike dënon presionin dhe shantazhin e ushtruar gjatë këtyre ditëve ndaj pedagogëve dhe studentëve dhe paralajmëron Edi Ramën dhe veglat e krimit të organizuar brenda arsimit të lartë që të mbajnë larg duart nga Universitetet. Edi Rama dhe Besa Shahini duhet të kenë të qartë se askush nuk mund të cënojë dinjitetin e pedagogëve dhe studentëve shqiptarë. Askush nuk mund të urdhërojë zgjedhje pa pedagogë dhe pa studentë. Askush nuk mund të injorojë vullnetin e tyre, për një proces të rregullt dhe ligjor të zgjedhjeve në Universitete”. /tvklan.al

Të ngjashme

Grupi

Kallezo