Partia Demokratike i është përgjigjur me anë të ish-deputetes Jorida Tabaku, kryebashkiakut të Tiranës Erion Veliaj në lidhje me sulmet e këtij të fundit ndaj opozitës.

Përmes një deklarate Tabaku e konsideron Veliaj “kukull” të kryeministrit dhe shton se hedh baltë ndaj opozitës me qëllim për të larguar vëmendjen nga dështimi i qeverisë në të gjitha fushat.

“Ndërkohë që Shqipëria ka mbetur në vendnumëro, për faj të Edi Ramës, kukulla e tij në krye të Bashkisë së Tiranës vazhdon çdo ditë sulmet politike e baltën politike. Kjo ndodh me arsyen e vetme për të larguar vëmendjen nga dështimi i Edi Ramës në ekonomi, nga dështimi i Edi Ramës për menaxhimin e pandemisë, nga dështimi i Edi Ramës në shëndetësi, nga rritja e varfërisë, nga rritja e papunësisë e nga rritja e shqiptarëve që largohen nga vendi, nga rritja e emigracionit”.

Tabaku i bëri thirrje Veliajt që të punojë për qytetarët dhe jo për klientët.

“Erion, një herë të vetme puno për qytetarët e Tiranës dhe kaq pak kohë sa të ka mbetur në krye të Bashkisë së Tiranës, mos mendo vetëm për klientët e xhepin e tyre. Ndërkohë që sot shqiptarët po dëgjojnë angazhime konkrete serioze, ndërkohë që sot shqiptarët po dëgjojnë se çfarë do të fitojnë pas 25 prillit. Ndërkohë që sot shqiptarët po vendosin që një herë e mirë të largohen nga Edi Rama, të largohen nga ky model politik i cili ka sjell dështim në jetën e secilit. Më 25 prill fiton Shqipëria! Më 25 prill fitojnë shqiptarët! Më 25 prill largohet Edi Rama!”/tvklan.al