Një 31-vjeçare britanike, e cila nuk mund të fliste për 2 muaj për shkak të një dëmtimi misterioz në tru, e rifitoi zërin e saj, por tani mund të flasë me katër thekse të ndryshme.
Emily Egan u bë memece në Janar të këtij vitit dhe mjekët mbetën pa fjalë, pasi me dhjetëra teste nuk arritën të zbulonin përse ose çfarë e shkaktoi këtë gjendje.
Në fund të Marsit, Emily nisi të fliste sërish, por zëri i saj nuk kishte asnjëlloj ngjashmërie me theksin prej Essex që kishte pasur më parë.
Emily tanimë flet kryesisht me theks polak, e ndonjëherë edhe me një anglishte të keqe, por theksi i saj mund të shndërrohet papritur edhe në gjuhë frënge e italiane.
Nëse është në gjendje stresi flet me theks polak dhe nëse është e lodhur, 31-vjeçarja mund të humbasë totalisht aftësinë për të folur.
“Nuk është vetëm theksi që ka ndryshuar. Nuk mund të flas apo të mendoj në të njëjtën mënyrë si më parë dhe as nuk mund të ndërtoj fjali siç bëja më parë. Shkruaj ndryshe tani dhe i gjithë fjalori im ka ndryshuar. Anglishtja më është përkeqësuar edhe më shumë, pavarësisht se kam tërë jetën që jetoj në Britani”, tregoi 31-vjeçarja për të përditshmen britanike Mirror.
Pas shumë muajsh konfuzion, Emily është diagnostikuar tashmë me sindromën e thekseve të huaja, një çrregullim i rrallë i të folurit që shkaktohet nga dëmtimi i trurit, shkaku i të cilit në rastin konkret nuk dihet ende.
Ajo nisi të kishte dhimbje koke për dy javë radhazi përpara se zëri t’i trashej. Më pas e folura nisi t’i ngadalësohej. U dërgua me urgjencë në spital, ku dhe e humbi tërësisht aftësinë për të folur.
Gjuhën e rifitoi teksa ndodhej për pushime, pasi neurologu i kishte këshilluar që të përpiqej që të relaksohej sa më shumë të mundej./tvklan.al
