Zyra e Prokurores së Përgjithshme të përkohshme Arta Marku, ka reaguar pas publikimit të përgjimeve të dosjes “339” për bandën e Avdylajve të Shijakut. Në reagimin dërguar mediave, thuhet se kryeprokurorja u bën thirrje prokurorëve që po ndjekin dosjet “339” dhe “184” që të hetojnë dhe të zbardhin sa më shpejt këto çëshje. Kryeprokurorja e përkohshme kërkon gjithashtu që personat e implikuar në vepra penale të dalin përpara përgjegjësisë.

Në reagim thuhet gjithashtu se nxjerrja e sekretit hetimor dhe publikimi i këtyre përgjimeve në media nuk duhet të kishte ndodhur. Arta Marku kërkon që të hetohet nxjerrja e këtyre përgjimeve, teksa bën me dije se ka nisur një hetim administrativ për të zbuluar mënyrën si kanë lëvizur CD-të me përgjime nga Prokuroria e Përgjithshme drejt Prokurorisë së Krimeve të Rënda.

Deklarata e Zyrës së Prokurorisë së Përgjithshme:

Duke marrë shkas nga publikimi i disa materialeve të përgjimit në gazetën gjermane Bild, Prokurori i Përgjithshëm njofton opinionin publik se po ndjek çështjen me shumë vëmendje dhe ashtu siç ka kërkuar edhe më përpara, kërkon dhe u bën thirrje prokurorëve që kanë në hetim çështjet 339 dhe 184, si autoritetet e vetme në ushtrimin e ndjekjes penale për këto çështje, që të hetojnë dhe të zgjidhin pa humbur kohë këto cështje, duke vënë para përgjegjësisë penale këdo që ka konsumuar një vepër penale. Ky është jo vetëm detyrim kushtetues dhe ligjor, por edhe një detyrim publik për të bërë të qartë cfarë ka ndodhur me këto cështje dhe cfarë kanë ato në përmbajtje.

Prokurori i Përgjithshëm ndjehet i indinjuar që në radhët e prokurorisë akoma militojnë prokurorë apo punonjës të tjerë që janë gati që për interesa të vogla personale të bëjnë pazar me cdo dosje penale duke kontaminuar opinionin publik me informacione të pahetuara dhe të paverifikuara nga ata vetë si autoritetet përgjegjëse për hetimin dhe verifikimin e tyre.

Prokurori i Përgjithshëm i bën thirrje prokurorisë kompetente që të hetojë me shpejtësi nxjerrjen në publik të akteve që përbëjnë sekret hetimor dhe të vihet para përgjegjësisë penale kushdo, prokuror, oficer i policisë gjyqësore apo dikush tjetër që ka poseduar për shkak të ligjit CD-të dhe në vend që të ushtronte funksionet ligjore dhe të kryente hetimin objektiv, ka bërë publikimin e tyre.

Prokurori i Përgjithshëm njofton opinionin publik se ka filluar një verifikim administrativ të mënyrës sesi kanë lëvizur CD-të dhe DVD-të, si dhe cdo material tjetër përgjimi, nga Zyra e Përgjimeve në Prokurorinë e Përgjithshme, në drejtim të Prokurorisë së Krimeve të Rënda.

Gjithashtu, Prokurori i Përgjithshëm, në zbatim të kompetencave aktuale njofton opinionin publik se ka miratuar udhëzimin nr.4, dt.26.10.2018 “Për përgjimet” ku përcaktohen në detaje rregullat për ruajtjen e sekretit të përgjimit. Nxjerrja e sekretit ka ardhur jo si pasojë e mungesës së ligjeve apo akteve nënligjore dhe administrative, por për arsye të tjera larg çdo norme ligjore apo morale.  /tvklan.al