Rriten interesat për individët
Treguesit e dhënies së kredisë së re për ekonominë kanë shënuar përgjysmim në fund të muajit Maj, duke u ndikuar nga të dy faktorët, situata financiare e bizneseve nuk ka qenë optimale për të kërkuar kredi, por dhe bankat kanë shtrënguar kushtet.
Sipas të dhënave të Shoqatës së Bankave, kredia e re në Maj rezulton 11.9 miliardë lekë, nga 17.2 miliardë që ishte në fund të Prillit dhe poshtë mesatares së vitit 2019, ku nisi rigjallërimi i huadhënies.
Forma më e madhe e kreditimit të bizneseve në këtë periudhë ka dominuar ajo e kredisë afatshkurtër dhe overdrafteve, ndërsa huadhënia për sipërmarrjet private ka rënë me 50% krahasuar me Marsin e një viti më parë.
Edhe individët janë prekur nga shtrëngimi i kushteve të dhënies së kredisë. Kredia e re për këtë kategori është rritur krahasuar me Marsin dhe Prillin, por sërish mbetet në nivele të ulëta huadhënie për blerje banesash.
Normat e interesit për kreditë e individëve janë rritur në të gjitha monedhat, ku ajo në dollarë ka kërcyer në 14.7%, ndërsa pre kreditë në lekë interesat mesatare janë 6.3%.
Ndërsa për bizneset kredia në euro dhe lekë është më e lirë në fund të Majit. Tkurrja e aktivitetit kreditues ka qenë i pritshëm në këtë periudhë pandemie për shkak të perceptimit në rritje të riskut që kanë bankat për ekonominë.
Tv Klan
