Plani i Biden për ta çuar vaksinën në çdo shtëpi


Plani i Biden për ta çuar vaksinën në çdo shtëpi

23:54 12/07/2021

Vaksinimi ende në shkallë të ulët në SHBA, rritje të infektimeve tek moshat e reja

Qendra amerikane për Kontrollin dhe Parandalimin e Sëmundjeve  konfirmuan se zonat  ku vaksinimi ishte në shkallën më të ulët po shohin rritje të shtrimeve në spital. Grupmosha më e prekur janë  nga 18 vjeç deri 49 vjeç që përbëjnë 40% të të shtruarve. Më herët Presidenti Joe Biden tha se është koha për një fushatë të gjerë informuese për të bindur njerëzit që të vaksinohen .

 “Duhet të shkojmë në çdo komunitet, çdo lagje dhe shpesh herë edhe derë më derë, të ndihmojmë pjesën e mbetur të banorëve të mbrohen nga virusi”,  u shpreh kreu i Shtëpisë së Bardhë. Disa ligjvënës republikanë u shprehën të shqetësuar nga plani i qeverisë federale për të dërguar njerëz tek shtëpitë e amerikanëve. Administrata Biden sqaroi se Presidenti nuk nënkupton që agjentët do të detyrojnë njerëzit të vaksinohen.

Ndasitë e vazhdueshme partiake duket se po pengojnë përpjekjet për vaksinim. Më pak se gjysma e republikanëve të anketuar nga rrjeti “ABC” dhe “Washington Post” thanë se janë vaksinuar, ose se do të vaksinohen, krahasuar me 93% të demokratëve. Shtetet e Bashkuara vazhdojnë të kenë një të tretën e popullsisë të pavaksinuar kundër COVID-19.

Qendra për Kontrollin dhe Parandalimin e Sëmundjeve tha se shkollat duhet të hapen plotësisht në Vjeshtë. Por shtoi se vendimi nëse studentët dhe stafi që janë vaksinuar plotësisht duhet ose jo të mbajnë maska, mund të jetë sërish një çështje partiake. Guvernatorët republikanë në Arkansas dhe Teksas po kundërshtojnë maskat për studentët, ndërsa zyrtarët në Kaliforni, një shtet me prirje demokrate, po kërkojnë vendosjen e tyre, sepse distancimi fizik nuk është gjithmonë i mundur në klasë.

Klan News






Të ngjashme