Pas zbulimit të një kufome në një makinë në Ponte Felcino, Prokuroria e Perugias ka nisur hetimet për 3 persona.

Eduart Kozi, një shqiptar rreth të 50-ave mbeti i vrarë me një plumb në kokë, ndërkohë që ndodhej brenda Audit Avant A6 dhe po tentonte të arratisej pas një grabitjeje.

Banda, që dyshohet se ishte e përbërë nga 3-4 anëtarë, pas alarmit të lëshuar gjatë grabitjes së një dyqani cigaresh në rrugën Messina, u përpoq që t’i ikte karabinierëve dhe punonjësit të sigurisë private.

Nga kjo pikë nisi dhe ndjekja e autoriteteve për të ndaluar Audin e grabitësve, që tentoi gjithashtu të spostonte makinën e rojes së sigurisë.

Në drejtim të grabitësve u qëllua me armë zjarri, si nga karabinierët ashtu edhe nga security, por ata nuk ndaluan dhe u larguan. E gjithë kjo ngjarje ndodhi rreth orës 4 të mëngjesit të së enjtes, ndërsa rreth orës 8 u zbulua automjeti i braktisur i grabitësve dhe brenda tij edhe trupi i pajetë i shqiptarit.

Për ngjarjen, Prokuroria e Perugias ka nisur hetimet për karabinierët dhe rojen e sigurisë që qëlluan mbi shqiptarin, për akuzën e vrasjes me dashje.

Por ndryshe mendon Ministri i Brendshëm italian, Matteo Salvini, i cili në një reagim në Twitter thotë se ata meritojnë

“shpërblim dhe jo proces gjyqësor”.

“Karabinierët dhe punonjësit e policisë private që rrezikuan jetën, bënë thjeshtë punën e tyre

“, shkruan Salvini në postimin e tij.

/tvklan.al