Anulimi i testimit nga Drejtori i Policisë së Shtetit, Ardi Veli për gradën “Komisar”, 6 ditë pasi ishte zhvilluar, ka ngritur pikëpyetje të mëdha, për shkaqet e vërteta që çuna në këtë vendim. Për këtë arsye, Shërbimi për Çështjet e Brendshëm dhe Ankesat bëri një kallëzim në prokurori për shpërdorim detyre dhe të gjithë personat që u morën me mbarëvajtjen e procesit dhe organizimin e tij do të hetohen.
Është e paqartë se si Ardi Veliu zbuloi 6 ditë me vonesë se në konkurs ishte cënuar integriteti i procesit, pasi disa oficerë të policisë kishin kopjuar. Në datën 7 Nëntor, pasi mbaroi provimi, procesi u certifikua nga disa zyrtarë të lartë të Policisë së Shtetit dhe misione të huaja që asistojnë blutë prej vitesh.
Misioni “PAMECA” e cilësoi procesin e testimit si të rregullt dhe nuk ishte parë asgjë e dyshimtë nga ata. Gjithashtu, edhe dy përfaqësuesit e policisë, Sokol Bizhga dhe nëndrejtoresha Aida Hajna, e kanë firmosur procesin si të rregullt.
Vetëm pas 6 ditësh, Ardi Veliu ka vënë re se integriteti i procesit ishte cënuar, por pa bërë publike arsyet e tij. Tani veprimet hetimor për të zbardhur të vërtetën, se çfarë ka ndodhur me konkursin, i ka Prokuroria e Tiranës, e cila ende nuk ka hedhur në short dosjen për të caktuar prokurorin.
Sipas kallëzimit të SHÇBA-së, veprimet do t’i verifikohen të gjithë zinxhirit drejtues të policisë, si anëtarë të Komisionit të Gradave. Mësohet se komisioni përgjegjës për organizimin e konkursit përbëhej nga vetë Drejtori i Përgjithshëm i Policisë së Shtetit, Ardi Veliu, zëvendësja e tij përgjegjëse për kufirin, Aida Hajna, Drejtori i Akademisë së Sigurisë, Bilbil Mema dhe Sokol Bizhga e Ali Allaraj.
Konkursi i dytë ishte vendosur të mbahej më 15 Nëntor, por 470 efektivët që garojnë për 133 grada “Komisar”, as nuk u futën në sallat e testimit. Policia nuk ka dhënë ende sqarime mbi këtë vendim, duke ngritur dyshime mbi arsyet e vërteta të anulimit.
Tv Klan
