Format e shpërndarjes së lëndëve narkotike tek “klientët” e bandave kriminale, kanë rezultuar nga më të ndryshme. Por një grup prej 6 shqiptarësh, duket se kishin krijuar një formë “interesante” për të dërguar lëndën narkotike tek “klientëve” të tyre direkt e në shtëpi, përmes shërbimit taksi, kamufluar pas shitjes së picave dhe birrave.
Policia e Torinos në Itali ka arritur të demaskojë shqiptarët të cilët vepronin kryesisht në zonën e Canavese.
Banda shqiptare komunikonte me blerësit e saj përmes telefonit apo rrjeteve të ndryshme sociale, por me kode të caktuara për të mos rënë në sy, ndërsa përdornin një restorant në qendër të Cirie, i menaxhuar nga njëri prej tyre.
Mediat italiane shkruajnë se për t’u shmangur kontrolleve të policisë, banda shqiptare nuk e mbante lëndën narkotike me vete, por e groposte në pyje, duke marrë vetëm sasinë që u duhej për të dorëzuar.
Të ardhurat mujore nga aktiviteti kriminal, përllogaritet se shkonin mbi 50 mijë euro. Pas kontrolleve të ushtruara, policia ka mundur të sekuestrojë në total 38 mijë euro kesh. Ndërkaq, identitetet e të arrestuarve nuk janë bërë publike. /tvklan.al
