Kërkojnë pagë shtesë për ditët që nuk kanë punuar
“Largohuni që këtu, është e kundraligjshme”.
Paralajmërimi i policisë iu drejtua operatorëve të transportit publik që dolën për të tretën herë në protestë.
Duke e cilësuar një grumbullim të paligjshmëm në periudhën e Covid – 19, policia i shpërndau ata pas 60 minutash.
Ky veprim hasi në rezistencën e operatorëve të transportit që kërkuan nga Ministria e Infrastrukturës dhe ajo e Financave akordimin e një pagë shtesë për ditët që nuk janë në punë dhe rinisjen e këtij shërbimi sa më shpejt.
Operatorët paralajmëruan se do t’i vijojnë protestat deri në përmbushje të kërkesave të tyre për uljen e akcizës së naftës, uljen e TVSH-së dhe rimbursim për uljen e numrit të pasagjerëve.
Ministria e Infrastrukturës ka reaguar për protestën duke thënë se hapja e transportit publik nuk është në tagrin e saj, por të Komitetit Teknik të Ekspertëve që vlereson situatën e Covid – 19.
Ndërkohë, policia ka proceduar 7 prej protestuesve pasi protestat dhe tubimet u ndaluan nga qeveria.
Tv Klan
