Kryeministri Edi Rama deklaroi këtë të martë se në orët në vazhdim do të shkruhet një dokument pas ankesave të qytetarëve të cilët kanë hasur vështirësi nëpër banka me këstet e kredive.

Kreu i qeverisë u shpreh se ka folur me Guvernatorin e Bankës së Shqipërisë Gent Sejko dhe për ta hartuar këtë dokument është ngritur një grup i përbashkët pune.

“Lidhur me ankesat që më kanë dërguar disa prej jush, të cilët kanë hasur sot vështirësi nëpër banka për këstet e kredive të biznesit që gjendet në vështirësinë e luftës, sapo kam folur me Guvernatorin e Bankës së Shqipërisë. Brenda pak orëve një grup i përbashkët pune do të shkruajë një dokument të përbashkët, që unë dhe guvernatori do ta firmosim sot për të adresuar qartë dhe prerë këtë hall me bankat”!

Rama u shpreh se nesër do të marrë zgjidhje problemi i bizneseve me bankat. Kreu i qeverisë i kërkoi qytetarëve të kenë durim dhe tha se masat ekonomike do të jenë gati këtë javë

“Rrini të qetë dhe bëni durim, Italia masat ekonomike i mori pas një muaji, sepse nuk është 7×7=42 kjo punë, ndërsa ne do t’i kemi gati këtë javë! Kurse biznesi që ka hallin e kësteve me bankat, do ta ketë zgjidhjen sot! Na i bëni hallall shqetësime të tilla dhe mos e vini asnjë sekondë në dyshim se mua më keni në krah dhe me sytë e veshur hapur ditë-natë për të lexuar e dëgjuar hallet tuaja! Ju të gjithë jeni familja ime në këtë luftë dhe asgjë që do ta bëja për familjen time, nuk do ta le pa bërë për ju! Me mish e me shpirt”!

Banka e Shqipërisë ka vendosur të shtyjë deri në 3 muaj pagesën e kësteve të kredive për individët dhe bizneset të cilët nuk kanë mundësi të shlyejnë detyrimet për shkak të mbylljes, si pasojë e masave të marra për izolimin e koronavirusit./tvklan.al